“Kondii-poigu” sai “Arlekinan”

Tänävuon Arlekin-festivualis kilbailtih Ven’an eri teatroin 89 spektaklii. Kai nämmä spektaklit ollah lapsih niškoi da luajitut 2015-2016 teatrukavven aigua. Parahikse ekspertat vallittih vaiku kuuzi spektaklii. Niilöin joukos on Karjalan tazavallan Kanzallizen teatran spektakli “Kondii-poigu”, kuduan ohjuajannu on V’ačeslav Pol’akov.

Kondii-poigu -spektakli on suannuh Arlekin-festivualis nelli palkinduo. Karjalazien suarnoin mugah luajittu spektakli on ven’ankieline, ga kai ritualizet tavat spektaklis ollah karjalan kielel. Tämä spektakli rodih parahakse festivualis, sai diploman da hobjazen Arlekin-vestoksen da dengupalkindon. Spektaklin ohjuaju V’ačeslav Pol’akov rodih laureatakse nominatsies “Paras ohjuajan ruado”, a spektaklin taidoilii Jegor Kukuškin voitti Paras taidoilijan ruado -nominatsies. Paiči sidä Kondii-poigu -spektakli sai Teatruarvostelijoin assotsiatsien palkindon.

Pidäy sanuo, ku spektaklin “suittolippahas” jo on Majatuli-festivualin palkindo “Paras akt’ouruansambli”.

V’ačeslav Pol’akoval on jo ideidu uudeh lapsien spektaklih niškoi. Ohjuajan sanoin mugah, uvven spektaklin pohjannu rodieu skandinaavine starin, kuduan urholoinnu ollah vikingat da trollit.