Vienan Karjala

Kirjutukset vienankarjalakse

Passibo sinule, mama!

Nina Sem’onovna Makaroval on viizi lastu, yheksä bunukkua da yheksä pruavobunukkua.

Tämä kerdomus rodieu yhten inehmizen elaijas, kudai oligi kaikel enne voinua rodivunnuol polvel. Nygöi se polvi jo hil’l’akkazin häviey.

Muamo rodivui vuvvennu 1941 Sem’on da L’ubov’ Pantelejevien pereheh Lahten kyläh. Tuatto Sem’on Andrejevič Pantelejev ruadoi silloi transportan bazan johtajannu. Muamo L’ubov’ Fomična ruadoi sel’sovietas.

Voinu tabai Ninočkan lapsennu. Tuatto otettih voinale, voinan allus kerras tapettihgi. Nygöi Čuiniemen kyläs seizou obelisku, kuduas voibi lugie died’oin sugunimi. Joga vuottu myö kävymmö sinne.

Eliä oli jygei. Nina Roza-sizärenke da muamanke työttih evakkoh. Evakos Roza kuoli. Evakon jälles Nina muamanke tuldih Siämärven kyläh, kus L’ubov’ Sem’onovna eli enne voinua da kus elettih hänen vahnembat.

Nina kazvoi kärzijänny da perävymättömänny tytönny. Muanruadajien perehes kazvajes kui toizetgi häi maltoi ruadua lapsusaijas. Kyläs eläjes eihäi sua patistellakseh. Vuvvennu 1947 Ninan muamo vastai Aleksandr Kimovič F’odorovan, kudai rodih perehen hyväkse tuvekse. Pereheh rodivui vie kolme lastu: Vladimir, Boris da P’otr. Pahakse mieldy, Boris da P’otr jo ollah toizel ilmal. A vahnembi Vladimir-velli hos eläygi ylen loitton, Novgorodan alovehel, ga ainos kävyy gostih sizärellyö perehinneh.

Seiččei kluassua meijän muamo loppi Siämärven kyläs, kaheksanden da yheksänden kluasan loppi jo Priäžäs, kus eli internuatas. Vuvvennu 1957 häi lähti ruadamah mielivoimattomien bol’niččah sanitarkakse Säpsän kyläh. Kohtinastu dorogua sinne ei olluh. Talvel, konzu järvi jiädyi, pidi ajua ruadoh hevol järvie myöte. Nosta pidi ylen aijoi. Hyvä oli, konzu sai hebo val’l’astua da regyzis ajua, muite jallai pidi astuo. Se nygöi häi sanelou sidä nagrajen, ga tozidieloshäi oli ylen jygei. Myöhembi heidy viettih ruadoh furgonas kezäl dai talvel. Yhtes kohtas muamo ruadoi 39 vuottu, händy sie ylen äijäl kunnivoittih.

Siämärven kyläs muamo vastai oman ozan – Anatolii Ivanovič Makarovan, kudamal jo oli kolme omua lastu. Iče mustelou, ku tansilois häi oli vesselin da kirmevin tyttö, kaikin brihat häneh kačottih... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat