Vienan Karjala

Kirjutukset vienankarjalakse

Sortavalašša paissettih Karjalan šuurin kalitta

Karjalan šuurin kalitta oli oikein makie // Kuva: Nikolai Anisimov

Tavan mukah festivalin piähahmokši tuli karjalaisien perintehellini piirua – Kalitta. Festivalin aikana kaikki pakinat košettih tätä piiruata ta kalittojaki oli eri makuh – makeita ta šuolasie, šuurie ta pikkaraisie. Sriäpnän hyvä maku oli ilmašša iltah šuaten, hoti Luatokalta toičči kovašti tuuli. Kuni pruasniekan piälavalla esiinnyttih paikalliset ta kušutut artistat, keittäjät Karjalan eri puolilta paissettih kalittoja ta piettih muasteri-oppija.

Sortavalan Partala-kylän internatin ruatajat ta eläjät joka vuosi otetah ošua tähä pruasniekkah.

Karjalaisien omäperäni kilttuuri oli näkyvissä ei vain kalittojen paistamisešša. Pruasniekan aikana tauštamusiikkina kuulu Myllärit-yhtyvehen lauluja, urheilukentällä pelattih kyykkyä, rannašša noššettih lempie.

– Monet niistä, kellä lempi oli noššettu, šanottih, jotta heti tunnetan lempi-loiččušanojen vaikutušta, muhiu Karjalan Rahvahan Liiton johtaja Natalja Vorobei, – muiten ei ni voinun olla! Meilähän on oikie lempivašta, kumpani on leikattu yhekšäštä kolmen tien risteykšeššä kašvajašta koivušta. Lähiaikoina Sortavalašša pitäy tulla äijän häitä! Meilä oli mukana 40 Lemmennoššon tovissušta, niin jakoma ne kaikki.

Tavan mukah, festivalin huippukohtana on Piipun piha -hotellin ravintolan keittäjien paistaman muajilman šuurimman kalitan jakomini. Kalittua kannettih kantošijalla kuin turkkilaista šuarie. Še vietih piälavan viereh ta šiinä ni juattih pruasniekkarahvahalla. Viime vuotena kalitta oli 2,10 metrin pituni ta 0,95 metrin levie. Tänä vuotena še tuli vielä šuuremmakši – 2,56 metrin pitusekši ta 1,05 metrin leviekši. Tämä on muajilman uuši ennätyš.

Kalitta oli ylen makieki! Karjalan Rahvahan Liiton porukka, kumpani piti pruasniekalla omua ohjelmua, niise šai palasen potakan ta kirjolohin kera.

Pruasniekan järještäjät kehitetäh kalitta-perintehie ympäri vuuvven. Sortavalan kost’at ollah varmat ta toisillaki šanotah, jotta Sortavalašša paissetah muajilman makeimpie kalittoja. 

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat