#24 (1364)

Mennyt suovattan Petroskois piettih vuotettavu pruazniekku – linnanpäivy. Kuningahan Pedri I käskyn mugah perustettu linnu on täyttänyh 314 vuottu. Pruazniekan deviizakse roittihes piäl 200 vuottu tagaperinAleksandr Suvorovan sanotut sanat: Petroskoi on kuulužu. Ven’an suuri mies sanoi net sanat, konzu kävyi Oniegan järvel seizojale puškuzavodale. Pruazniekan aigua Petroskoin eläjih da gostih niškoi piettih äijy piduo, kuduat kestettih huondekses yön pimiessäh.

Täl kerdua kiännämmö aižat Anuksen čupule da opimmo sellittiä Žil’čoin kylän nimen.

Karjalan tazavallan piämiehen virguvellalližuos toimii Artur Parfenčikov ezmästy kerdua pidi karjalazien, suomelazien da vepsäläzien nevvoston istundon kezäkuun 20. päivänny. Se vastavus oli myöhästynnyh pluanan mugah, ga yhtelläh pietty aigua žiälöičemätä – kesti enämbän kahtu čuassuu.

Karjalan pohjosešša jatetah Kemin Uspenjan tuomijokirikön restaurointie. Kaivauštöijen aikana on löyvetty hautauš, minne hauvattih vainaita ennein Petri Šuuren aikua.

Vuosišuan nellänneš pieni Ontajärven kylä on ystävyššuhtehissa šuomelaisen Öllölän kylän kera. Juhlatilaisuš piettih 16. kešäkuuta Ontajärveššä.

Perintehellini Uhtuon karjalaisien pruasniekka “Kanervačäijyt” piettih Kalevalašša 17. kešäkuuta.

Kešäkuun 23.–25. päivinä Karjalašša piettih Venäjän eeppisien kulttuurien kilpailu-festivalin finali. Šiih ošallistu yli šata artistua, 13 kollektiivie Venäjän yhekšältä alovehelta. Eeppini forumi 2017 -festivalin tapahtumie järješšettih kolmen päivän aikana Karjalan kolmešša paikašša: Petroskoissa, Aunukšešša ta Kintahan kyläššä.