Vienan Karjala

Kirjutukset vienankarjalakse

Muuminotkon Kylmykuu

// Kuva: Ol’ga Smotrova, “Oma Mua”

Karjalan Kielen Seuru piästi ilmoih seiččemenden karjalankielizen Muumi-kirjan “Muuminotkon Kylmykuu”. Karjalakse tevoksen kiändi Natalja Sinitskaja, čomazet on luajittu Tuovi Lainen käil.

Vaste ilmoih piästetys muumikirjas kerdoi sen kiändäi Natalja Sinitskaja.

Erähänkerdaine muumikirju, kui aijembazet kiännetyt kirjat on romuanan muvvos, ga s’užiettu on ihan erilline. Sygyzyn tulduu kai Muuminotkon eläjät piätettih tulla gostih muumiperehen luokse. Ga kummua on – talois nikedä ei olluh. Muumipereh ei jättänyh nimittustu viestii, sendäh gost’at jiädih taloih vuottamah ižändöi. Kirjan eričus on sit, ku täs kirjas kiinnitetäh mieldy muuminotkon eläjih, ei muumipereheh.

Kiännösprotsesas Natalja sanoi muga:

– Kiändiä muumikirjoi on minule mieldy myö. Voin sanuo, ku pitkäs aijas muumipersonuažat roittih lähezet minule, ellendiä niidy da kiändiä kirjoi rodih jo helpombi.  Enzimäi minä kiännin muumikirjoi ven’an kieles verraten suomeh, ga terväh ellendin, ku parembi on käyttiä vaigu suomenkielisty versiedu, se on lähembi ruočinkielizeh algutekstah. Minun mieles ven’ankieline versii on toiči liijan pessimistine, hos kirjan mieli on aiga vessel. Äijäl kiitän Martti Penttostu, kudai tälgi kerdua avvutti minule da toiči sellitti erähii kul’tuurizii eroloi da vaigieloi kohtii.

Tämä on seiččemes muumikirju, kudai karjalakse on kiändänyh Natalja. On olemas vie parua muumimuailmas kerdojua kirjua, ga net ollah jo tostu luaduu. Net ollah pienet kirjat čomazienke pienih lapsih niškoi. Natalja on valmis kiändämäh netgi karjalakse. Toivommo, ku karjalan kielele rodieu kiännetty kai muumikirjoin serii.

 

Kirjan hindu on 22€. Tilata kirjat voibi seuran Jovensuun ja Helsinkin toimistolois tel. +358-44 500 2215, kirsti.karhinen@karjal.fi da tel. 0400 246 266, pertti.lampi@gmail.com. Sežo voibi tilata net KKS:n verkolaukas: http://karjal.fi/.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat