Vienan Karjala

Kirjutukset vienankarjalakse

“Luadogu luaskau, sinine meri...”

– Ylen puaksuh nygyzis vezistönimilöis kuvastuu mintahto eländypaikan nimi. Luadoganjärven rannoil on moni linnua da kyliä, niis kuulužin da vahnin on Vahnu Luadogu -linnu, oli kanzoinvälizenny eländykohtannu da linnoituksennu. // Kuva: Kirill Ognev

Kaikkien suurien vezistölöin nimilöi on sellittiä ylen jygei, sildy gu net ollah ylen vahnat, innun-mannunaigua roinnuot. Moizii on Luadoganjärven nimigi. Luadogua mainitah Novgorodan aigukirjas jo vuvvennu 1228.

Ga yhtelläh ennevahnas täl järvel on olluh muudugi nimie. Nestoran vahnas aigukirjas Luadogu on Nevo, samankandaine kui järvespäi virduaju Neva-jogi. Nevokse järvie mainittih kai 1500-vuoziluvul. Samal aigua oli käytös Luadogu-nimi.

Suomelazet erähiči on kučuttu Luadogua Venenmerekse, se ven’alazien merekse. Skandinuavizis kirjuteksis löydyy vie eräs nimi – Aldoga da lähäl olijan linnan nimi Aldeigjuborg. Kudaibo järven nimis sit on vahnin, alguperäine?

Tutkijat opitah sellittiä Luadogan nimie jo kolmesadua vuottu. Filolougientiijon doktoru, nimistöntutkii Irma Mullonen tariččou teile uvvemban sellityksen:

– Ylen puaksuh nygyzis vezistönimilöis kuvastuu mintahto eländypaikan nimi. Voibi olla, järvel on olluh vahnu nimi, sit järven rannale rodih eländykohtu, sanommo, kylä libo linnu, da sit aijan mendyy tädä järvie ruvettih nimittämäh eländykohtan mugah. Voibi olla, Luadogan nimen tagua on sama histourii.

Luadoganjärven rannoil on moni linnua da kyliä, niis kuulužin da vahnin on Vahnu Luadogu -linnu, kudai on sijoitunnuhes Luadoganjärven suvirannale, sie, kus Olhavanjogi (Volhov) virduau järveh. Tämä linnu on olluh hyvin tärgei kohtu vahnal vezitiel Skandinaviespäi Vizantijah. Ven’akse sidä tiedy sanotah “iz var’ag v greki”. Tämä linnu on olluh moine kohtu, kudai vardoičči tädä vezitiedy. Sit on löytty vepsäläzii, muinasven’alazii da skandinaavizii arheologizii löydölöi jo 700-vuoziluvulpäi. Jo sih aigah Vahnu Luadogu oli kanzoinvälizenny eländykohtannu da linnoituksennu...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat