Vienan Karjala

Kirjutukset vienankarjalakse

Vieljärven kibiembii kohtii on sovhouzu da iložembii Karjalan Kielen Kodi

Karjalan piämiehen virguvellalližuos toimii Artur Parfenčikov, Priäžän piirin piämies Toivo Savolainen da Priäžän piirin administratsien piälikkö Oleg Jermolajev Karjalan Kielen Koin kačottuu lähtietäh vastavumah Vieljärven kyläh rahvahanke.

Organizatsien toimindua häi pani kuavakse toizile Karjalan kylile. Virgumies uskaldi löydyä sponsorat taloin toizen kerroksen luajindan loppiemizekse da auttua muapalazen suandua koin omažuokse. Nygöi se on vuogrumaksol.

Vastavus vieljärveläzienke meni sovhouzan kontoras. Piälimäzenny kyzymyksenny oli sovhouzan jygei tilandeh. Piämies uskaldi abuu sillegi jalloile piäzendäs da toivoi sihpäi, ku Vieljärven sovhouzu terväh rodieu Alavozen da Mägrien jyttyine. Sovhouzu ei pysty ottamahgi lainua bankaspäi. Rehulois on valmistettu vai nelläs vuitti talvekse. Lehmykarju on kurjas kunnos, rahvas pahelzunnuot. Vieljärven sovhouzas puaksuh vaihteltahes johtajat – se on suurembii vigoi mindäh se joudui moizeh pahah aigah. Dorogoin paha kundo pienembih kylih, huonot kunnallispalvelut, mobiiliyhtevyksen olemattomus pienis kylis, ruavon vähys da pienet palkat – nämmis paistih läs kahtu čuassuu. Vieljärven nägyvis suavutuksis on lapsien kižuandukenty keskikyläl da vie kesken olii sportuičendukenty. Net ollah valdivollizen programman jengat da rahvahan omat jengupanokset. Kylmykuukse uskalduksis on uuzi FAP – meidiekkuavun punktu.

Artur Parfenčikovan ajelukset Karjalan piirilöih kuulutah valličendukampainieh. Tazavallan piämiehen valličendoin päivy on 10. syvyskuudu.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat