Vienan Karjala

Kirjutukset vienankarjalakse

Vieljärven tytöt opastutah robotiekkah

Opastujat opitellah ohjelmoindua Scratch-kielel. // Kuva: Martti Penttonen

Mennyt vuvven kezäs algajen Karjalan Kielen Kois on pietty lyhykkäzii kursoi rubriekan “Robotiekkua da ohjelmoindua 9-99 vuodehizile” al. Urokoi on olluh kahtennutostu päivänny kolme čuassuu kerrallah da  niilöil kävyi viizitostu 9-14 vuvven igähisty opastujua – puolikse tyttölöi da brihaččuloi, ei ole vie tulluh 99-vuodehizii.

Nedälinlopul 9-10. syvyskuudu Sphero miäččy-robotan ohjelmoindukursale tuli viizi tyttyö. Hyö piästihgi läbi “ekzuamenas” da suadih “diplomat”. Sen jälgeh tytöt vie vähäzen tuttavuttih Scratch ohjelmoindukieleh, kudaman kursale hyö tullah kahten nedälin peräs. Heile sežo ozuttihes Martti Robottu, kudaman kursat alletah myöhembi sygyzyl.

Mindäh pidäy nengomii kursoi? Robotois nygöi äijän kirjutetah da paistah. Meijän kursoil net ollah atrapan, kuhkutuslinnun virras. Piätavoiteh on tiedokonehen ohjelmoindah opastundu. “Ohjelmoi, eiga roittos ohjelmoijukse!” Robottua suvaijah sendäh, ku ohjelmoindu on abstraktnoidu aivoborčua, robottu andau välittömän konkriettizen vastavuksen, kui elävy otus. Robotoin ohjelmoindan jälgeh on sit kebjiembi levendiä ohjelmoindumaltuo toizenmoizih sovelduksih. Toine syy opastuo ohjelmoindua karjalakse on nostua karjalan kielen prestiižua, ozuttua ku karjal ei ole sugupolviloi tagaperin hävinnyön primitiivizen rahvahan kieli, a kieli, kudai eläy täs da tulies aijas...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat