Ruadajen voimmo elättiä kodii jo iče

Pakkaskuun jälgimäzenny pyhänpiän Vieljärven kyläs piettih jo suurembas mieros tutun Karjalan Kielen Kodi -yhteskunnallizen organizatsien vuozikerähmö. Kolme vuottu tagaperin paikallizet rahvas valettih taloin alužimih kirjaine nouzijoile sugupolviloile, täkse aigua kodi seizou-kokottau  raviennu, čomannu da kuulužannu. Kolmenkymmeniäzen organizatsieh virallizesti kuulujien ližäkse on sadoi dai jo tuhanziigi Koin dovariššoi da kannattajii.

“Mennyt vuozi oli ezmäine, konzu jen’gua Suomespäi tuli vähembi migu Ven’alpäi. Suuriman vuitin myö saimmo täs, omas Karjalas, sen čotas omal ruandal. Täs hyvyös katammo maksot sähkölöis, muan vuogran, talohuon menot”, mielihyväl saneloi tulieksegi vuottu  halličuksen paginanvedäjäkse vallittu Ol’ga Gokkojeva. Karjalan kielen kois pienel maksol ruatah kerhot, täs ollah kehittymäs palvelut, otetah vastah lahjukset. Kaksi suurdu Ven’alpäi suaduu projektua autetah syväinpuolistu toimindua – Perspektiiva-fondan  da “Ven’an eläkkehelolijoin Liiton” vuitit ollah enämbi mil’l’onua rubl’ua...