Vienan Karjala

Kirjutukset vienankarjalakse

“Oi, Kukkarveh minä käymättäh en jätä...”

Kukkarven kylä 1950-1980 vuozinnu. // Kuva: Kartan azui Prokoin Iivan. On otettu Sydämele omat nimet -kniigaspäi.

Vuozisadoi lämmänny čuppuzennu omih eläjih niškoi oli Kukkarven kyläine Vieljärven čupul. Hos kylä on hävitetty jo läs puoldusadua vuottu tagaperin, yhtelläh endizien kukkarvilazien mieles parembua kohtua muailmas et lövvä. Kukkarven kyläh meil puutui kävvä yhtes jyrgil’čän, endizen piihtlahtelazen Vera Lukinanke da filolougientiijon douhturin Irma Mullozenke.

– Enne oli ylen suuri kylä, saneli meile meijän giidu Vera Lukina. – Nygöi nikedä eläjiä ei ole tiä. Ylen suurdu da hyviä perehty oli. Täs kyläs kazvoi ylen hyviä tolkoovoidu lastu. Miinan perehes, Jevsin, Goškin perehes. Vie toizen Miinan pereh oli. Vie Olešan pereh oli. Pelduo oli ylen äijy ymbäri kyläs. Täs kazvoi vil’l’ua, kartohkua, žiivattua.

Endizil vil’l’u- da kartohkupaikoil kazvau ristikanzan korgevus heiny. Vahnat niityt tuhjovutah. Parahin aigu Kukkarveh käyndäh niškoi on myöhäine sygyzy, konzu jo vähäzel kylmiäy muan, libo kevät, konzu jo sulau lumi, ga tiet vie ei pehmetä da ollah kovat, ku vois piästä mašinal. Toizekse, kezäl heinikös vilistäh mavot dai voibi imevyö kägöintäi.

Umbikarjalaine Kukkarven kyläine oli samannimizen järven rannal 8,5 kilometrin piäs Jyrgiläs, Sordavalan tien bokas. Kukkarven roinduvuozi ei ole tiijos, ga vähilleh 300 vuottu tagaperin, 1726 vuvvel, sie eli 12 hengie. Kahtensuan vuvven peräs, 1926 vuvvel, kyläs oli 18 taloidu da 104 hengie eläjiä...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat