Vienan Karjala

Kirjutukset vienankarjalakse

Kalevala piirrošfilminä

Piirošfilmi luajitah 2D tehniikašša ta šiinä tulou 34 ošua, Kalevala-eepossan runojen mukah.

Tämän vuuvven elokuušša Pobeda-nimini lapšien ta nuorien filmien studija kiänty Karjalan tašavallan halličukšen puoleh ehotukšella luatie yhteistyöššä kanšallini piirrošfilmi Kalevala-eepossan pohjalla. Šillä oli kekšitty työnimi – “Kalevala. Ihmeh-Sammon ečošša”.

Karjalan halličuš kannatti tätä idejua ta šajekuušša oli allakirjutettu yhteistyöšopimuš. Šen mukah meinatah luatie pirrošfilmin 34 ošua 2D tehniikašša. Joka oša keštäy noin 10 minuttie.

Mečäššyšperintehien festivalin aikana 25. pimiekuuta Karjalan piämieš Artur Parfenčikov ta tunnettu ohjuaja, skenaristi ta prod’usseri Igor’ Kalenov käsiteltih tämän projektin toteuttamiseh liittyjie kyšymykšie.

– Karjalan tašavallalla še on hyvin merkillini tapahtuma, šentäh kun myö kaikin olemma kašvan näillä runoilla ta on hyvin tärkietä, jotta ilmeštyy piirrošfilmi, 34 ošua eepossan joka runon mukah, Karjalan piämieš korošti.

Artur Parfenčikov kiänty ohjuajan puoleh pyynnöllä kiäntyä piirošfilmi karjalan ta šuomen kielellä ta toivo, jotta filmissä kuuluis kanšanšoittimien šoitto.

Filmi meinatah esittyä ilmasilla TV-kanavoilla – “Karusel’”, “Detski mir” šekä Rossija-kanavan Spokoinoi noči mališi -ohjelmašša ta šamoin ni makšullisilla satelliitti- ta kaapelikanavoilla.

Nyt Pobeda-studija valmistau hakemušta Venäjän Kulttuuriministerijön kilpailuh, min kautti annetah rahotušta kanšallisien pirrošfilmien tuotantoh. Kilpailu pietäh talvikuušša.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat