Vienan Karjala

Kirjutukset vienankarjalakse

Uuši lapšiennäytelmä pruasniekakši

Lapšiennäytelmien esittämini uuvvenvuuvven pruasniekkojen aikana on tullun jo hyväkši perintehekši Karjalan Kanšallisešša teatterissa. Nellä vuotta takaperin teatterissa muovoštu šamanmielisien porukka, kumpani rupesi luatimah šemmosie esitykšie. Tänä vuotena teatteri esittäy Trollin venččä -näytelmän, kumpasen ohjuajana on teatterin näyttelijä, Karjalan tašavallan anšijoitunut artista V’ačeslav Pol’akov.

– Meijän enšimmäisenä esitykšenä oli Thorbjørn Egnerin teokšen mukah ohjattu Natalja Sahanovan Šeikkailut myökki-pyökkimečäššä -näytelmäkirjutuš. Mie olin šen ohjuajana, taiteilijan ta lavaštajan tehtävistä vaštasi Jegor Kukuškin ta V’ačeslav Terentjev šävelti musiikin, Vačeslav Pol’akov muisteli.

Näytelmä mäni šuurella mäneššykšellä, a näytelmäššä esiintyjä kanšallisen teatterin näyttelijä Nikita Anisimov oli šuanun palkinnon lapšiennäytelmän parahašta roolista tašavallan Onežskaja maska -festivalissa. Šanakši, iče V’ačeslav Pol’akov oman 20-vuotisen näyttelijäuran aikana on näytellyn hyvin monešša lapšiennäytelmäššä.

Šeuruavana lapšienesitykšenä oli Kontie-poika -starina, šiitä, 2017 vuuvven uattona oli Ihmehšauva-näytelmä. Kaččojat oikein hyvin otettih vaštah näytelmie. Nyt teatteri kuččuu kaikkie uuvvella esitykšellä.

Näytelmän valmissuštyö alko teatterissa pimiekuušša. Käsikirjutukšen kirjutti Kanšallisen teatterin näyttelijä Ol’ga Portretova. Näytelmä kertou starinamaisen muan eläjien – holffien, orkinkien ta trollien šeikkailuista. Hyö matkuššetah mertä myöten, ečitäh Šuuren Trollin ihmehvenččua ta uartehie, nerokkahašti tapellah ta pelatah kyykkyä. Näytelmä on venäjän kielellä, kuitenki šen henkilöt välillä paissah muitaki kielijä, esimerkiksi norjakši, ruočiksi, karjalakši ta elffien kielellä.

Trollin venččä -näytelmän enši-ilta pietäh Kanšallisešša teatterissa 23. talvikuuta. Ta šen jälkeh esitykšie näytetäh joka päivä (paičči 31. talvikuuta ta 1. pakkaiskuuta) ihan Roštuoh šuaten 7. pakkaiskuuta. Joka esitykšen jälkeh kaččojie vuottau mukava uuvvenvuuvven ohjelma teatterin aulašša.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat