Vienan Karjala

Kirjutukset vienankarjalakse

Il’l’an pruazniekal Ilomantsis

“Randazen” artistat Vladimir da Tatjana Nikitinat, Viktor Arestov, Olga Vasiljeva, Vera Ivanova, L’udmila Orava. Tagan on Pyhän Il’l’an kirikkö. // Kuva: Nina Barmina

Kaksi vuottu tagaperin myö olimmo ozuttamas spektakliloi Varkaukses, Leppävirras da Lapinlahtes. Sil matkal tuttavuimmo monih karjalaizih aktivistoih, hyö käydih meijän luo Vieljärveh da sit kučuttih meidy ozuttamah teatrun’eruo Ilomantsih.

Heinykuun 19. päivänny kerävyimmö matkah, päivy oli ylen räkki. Ilomantsi ei ole loitton rajaspäi, terväh piäzimmö, dai ižändät tuldih vastah tiešuaral, ku emmo yöksys. Hedi tulduu algavuttih pivot: ristinsuatto Ilomantsin keskučaspäi Kokoonniemen kauti Elian kirikköh da panihiidu Johannes Karhapään kalmal. Ildusluužban jälles oli čuajuillačču. Rahvastu kerävyi enämbi 200 hengie. Vieljärveläzet saneltih KKK:n ruavos, ozutettih pienen ozutelman Vladimir Brendojevan Kaglakkai istundu -kerdomuksen mugah. Oli hyvä mieli, ku rahvas ellendettih karjalan kieldy, otettih vastah hyvin da räškytettih käzii. Illačun aigah oli muudugi ohjel mua, kanzanmuuzikkua, pajoloi da tansiloi.

Tossupiän, 20. heinykuudu, oli suuri pruazniekkupäivy – Il’l’anpäivy. Huondes zavodiihes liturgies, päiväl oli yhtehine murgin, kunne kerävyi kai pruazniekkurahvas: oli gostii Setu-mualpäi, Suomen eri čuppuloispäi, olimmo myögi, Vieljärven karjalazet. Kaikin sanottih tervehtyssanat, hyviteltih toine tostu pruazniekan kel, da Pyhän Elian kirikön hora pajatti pajon “Il’l’an juhla”. Oli äijy yhtehisty pajuo, kižua, tansii, lapset ozutettih oman ohjelman...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat