Vienan Karjala

Kirjutukset vienankarjalakse

Yksi kylä – moni nimie

Honganuan eläi Mihail Savin tuli kyläh 1960-vuozien allus Kalajuakoispäi. // Kuva: Kuva on leikattu fil’maspäi, operuattoru Igor’ Istratjev.

Honganual talvelgi piäzet ylen hyvin, dorogua pietäh hyväs kunnos talvengi aigua. Matkua Nuožarvespäi Honganual on 10 kilometrii. Kylän agjas dorogu lopeh. Endizeh aigah Nuožarveh Honganualpäi käydih venehel järvie myöte libo jallai troppua myöte.

Ga vuottu on äijy täl kyläl. Muiten gu täs ribzavodu gu ei ollushäi, täs ni kyliä ollus ei. Ribzavodu Nuožarveh gu rodiihes, luajittih dorogat da kai, näit, kylä elävyi. Dačniekkua nygöi on äijy. Nelli hengie on kyläs eläjiä kaikkiedah, sanou Mihail Savin.

Mies tuli tänne 1960-vuozien allus Kalajuakoispäi, naibi da jäi elämäh. Kalajuakoi oli pikkaraine karjalaine kyläine kolmen kilometrin piäs Honganuan kyläspäi. Kylä hävii. Rahvas kävväh sinne vai kalmoile omien piäle.

Nuožarven kalankazvatuszavodu pitkendi Honganuan igälangua. Kyläläzil oli ruaduo. Enämbi 20 vuottu tagaperin hävitetyn zavodan perindökse Honganual jäi vaiku tie. Muiten elos kyläs on ylen tyyni. Sendäh vakkinazen mašinan pihal nähtyy pihale kerras juokseldi Anna Jegorovna Ruhtojeva tiijustamah, ket olemmo da emmogo miäräile susieduakan muadu. Anna Jegorovnagi tuli täh kyläh miehele Kalajuakoispäi enämbi 50 vuottu tagaperin. Ukon kuoltuu kolme vuottu tagaperin inehmine jäi yksin, ga linnaspäi kävväh tiijustamah lapset da bunukat.

– Rahvastu ei ole nikedä! Nikedä. Kezäl on. Kezäl on vessel meile. Kezäl rahvastu ainos gul’aijah nečis. Tullah da mennäh. Libo avtolaukkah tullah, sit očeredis kai seizotah nečis. A talvel kahtei menemmö, koppuammo, myöjy Sveta iäre ajau, sanou Anna Jegorovna.

Čomat ennevahnallizet karjalazet taloit Honganual seizotah sellin Nuožarven järvehpäi, očin dorogahpäi, kudai menöy yliči kylän, sen agjassah. Täl Honganual eruou toizis karjalazis järvikylis. Arhitektoroin V’ačeslav Orfinskoin da Irina Grišinan mieles tämä on myöhäine keksindö, alguudah myö kai koit toinah oldih očin järvehpäi. Olgah kuitahto, ga tämä nivouse ei riko kylän čomuttu.

Vera Savina hyvin mustau taloloin karjalazet nimet. Hänen lapsusaijan kodi, kuspäi lähti miehele, on kaunehembi toizii. Sit ollah puuleikkavuksin čomendetut tuulilavvat da ikkunpielizet da galdari. Kodi on kruasittu maksankarvazekse, čomendukset ollah keldazet. Talvel kodi on tyhjy, nygöi sih tullah vai kezäkse:

– Meijän kodi oli Baškiirein. A nygöi tämä on Markovan, kus elämmö. Sie on Čihvan kodi n’okal, sit Hetin kodi, Bosin kodi, L’akoin, On’n’oin, F’oudoran, Osipan...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat