Vienan Karjala

Kirjutukset vienankarjalakse

Kanzallizet kielet meinatah ahtistua

Zakonan sellityslistal suau lugie, gu muutokset vastatah Ven’an kanzalazen oigevuttu kazvatus- da opastuskielen välläh valličendah. Sih puolehpäi dielot jongoi oldihgi menemäs mindäh sendäh jälgivuoziloin aigah puaksumbah sai kuulta da nähtä, ku kaikkiel kieliurokkoi školis vai vähendetäh, ei vai Karjalas. Virranomazet ližättih täh vai sen verran, ku kerhot sežo kuulutah školaprogrammah da niilöin kauti suau putilleh opastua kieldy da kul’tuurua niilöile, ket sidä tahtotah.

Veres zakonanprojektu on vie vai registriiruittu, tiijos ei ole konzu sidä ruvetah šeikuimah da iänestämäh. Ven’an aktivistat, kielien puolistajat jo nostih uudistu vastah. On kirjutettu kirjaine prezidentu Vladimir Putinale, kus prižmitäh sotkevuo täh dieloh da ei andua hyväksyö muutostu. Kirjazen tekstas suau lugie: “Zakonanprojektan ehoittajien dielo voibi vediä školien da lapsien vahnembien konfliktah, yhteiskunnan selgieh rikkomizeh... Vie pahembas kunnos roitah Ven’an tazavalloin valdivollizet kielet, kudamien opastamine on heitytty kerholoissah konstitutsieloin normii noudamata... Olemmo varmat, ku Ven’an muan Konstitutsien garantannu olles Työ etto anna hoduu moizele ilgiele zakonale”.

Kirjaine on avvoi internetas lugiettavakse www.change.org -fourumal, kudaman kauti sidä suau kannattua sähközesti jogahine Ven’an kanzalaine. Alguperäzeh kiändämykseh Putinalluo kerätäh arvovaldazien ristittyzien nimet, kudamien panos rahvahallizih kielih da kul’tuuroih on merkittävy. Mugai meijän Karjalan tazavallas luvettelo on kerdymäs. Täkse aigua sidä kannatettih yhteiskunnallizien liittoloin paginanvedäjät da aktivistat, laitoksien johtajat, kirjuttajat, tiedo- da lehtimiehet Viktor Bogdanov, Jelena Bogdanova, Aleksandr Volkov, Arto Rinne, Ol’ga Gokkojeva, Natalja Sinitskaja, Ol’ga Žarinova, Irma Mullonen, Aleksei Tsikarev, Alina Čuburova da tämän kirjuttai Natalja Antonova...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat