Vienan Karjala

Kirjutukset vienankarjalakse

Vieljärven joukko on tašavallan vahvin

1. Festivalin voittajat Vieljärvi-joukon peluajat Natalja Žulai (vaš.), Oleg Gapejev, Kirill Ivanov ta Vasili Zaharov. // Kuva: Natto Varpuni

Karjalan varaurheiluministeri Maksin Antipov pani merkillä, jotta Karjalan kyykkäjoukkojen pelitašo hyvin kašvau. Karjalaiset kyykkärit tullah voittajiksi monešša Venäjän kilpailušša šekä kanšainvälisissä kilpailuissaki. Festivalin avajaisissa Maksin Antipov iče heitti pari pualikkua kyykkäkentällä ta löi muutoma kyykkä čeristä.

Tänä vuotena festivalipäivä oli pitkä kuin nälkävuosi. Joukot alettih kilpailla klo 10.30 ta heitettih pualikkoja klo 18.00 šuaten. Kyykkärit kilpailtih šamanaikasešti nellällä kentällä. Enšin pelattih ryhmäpelie, šiitä puolifinalie ta loppukilpailuja. Piiristä tultuot joukot oltih ylen tyytyväisie, kuin pelie on niin äijän – eihän joka päivä šua lyyvvä kyykkie ta nähä toisien lyöntijä.

– Entisissä kilpauluissa myö voisima helpošti ennuštua, ket tulou voittajakši. Petroskoissa ollešša tiijämmä hyvin, ken mitein peluau piirilöissä, ken kehittäy omua kyykkäneruo, a ken ei harjottele vouse, kilpailun järještäjä Natalja Vorobei šano, tänä vuotena kilpailut oltih ylen lujat. Meilä tuli monta voimakašta joukkuo ta tulokšet oltih hämäräššä aivan kilpailun loppuh šuaten. Miun mieleštä tämä on ylen hyvä merkki. Tämä intriiga kuumenti kilpailujen henkie ta pakotti kyykkärie leikkie täyšin voimin, taissella joka kyykäštä.

Festivalih otettih ošua joukot Kalevalan, Kemin, Kontupohjan, Lahtenpohjan, Louhen, Aunukšen, Pitkärannan, Onegarannan, Priäžän, Segežan, Sortavalan, Šuojärven piirilöistä šekä Koštamukšen ta Petroskoin kaupunkiloista.

Voittajakši tuli Priäžän piirin Vieljärvi-joukko, kumpasen peluajina ollah Natalja Žulai, Oleg Gapejev, Kirill Ivanov ta Vasili Zaharov. Toisella šijalla piäsi Koštamukšen Kyykkämukša-joukko, šen peluajina ollat Sergei Staikov, Anton Lesonen, Jelena Kirjanen ta Eduard Kirjanen. Kolmannella šijalla piäsi Petroskoin Karjalan Rahvahan Liiton ILVEŠ-joukko, kumpasešša pelatah Jevgeni Karakin, Natalja Petrova, Aleksandr Černenok, Andrei Suščen’a ta Nikolai Nitskevič-Kurilo.

– Erikseh tahtosin šanuo Vieljärven-joukon peluajašta Vasili Stepanovič Zaharovista, kilpailujen piäsutja Jevgeni Karakin šano. – Mieš šynty vuotena 1943, ka on erikoisen hyväššä kunnošša. Turnaukšen aikana hiän näytti korkien pelitašon. Vasili Zaharov oli joukon nelläntenä numerona ta heitti pualikkoja viimesenä, omilla lyöntilöillä puhisti pellon aivan puhtahakši.

Vieljärven pojat Oleg Gapejev ta Kirill Ivanov pelatah kyykkyä koulušta alkuan. Tänä kešänä hyö molommat lähetäh armeijah. KT:n Kyykkäliiton puolešta toivotamma pojilla hyövyllistä armeijašša oloaikua ta vuotamma kyykkämualla vuuvven peräštä.

Festivalin valokuvie šuau kaččuo KT:n kyykkäliiton joukošša VK-sosialiverkošša vk.com/kyykkaliitto. Kaunista huavitointa kešyä kaikilla!

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat