Vienan Karjala

Kirjutukset vienankarjalakse

Pane rattahile oma biznessu

Se on ihan uuzi dielo Karjalan Kielen Koile. Enzimästy kerdua tänä kezän pietäh kahtenkymmenen päivän piduhizen školan Vieljärven kyläs yhteiskunnallizen liiton väil. Kučutah 14-25 igähizii nuorii, ket tahtottas tiediä, kui avata oma biznesdielo libo lujendua ruadoneroloi, harjavuo olemah ruadojoukos da tarita toizile oman ruadotuloksen.

Idei on lähtenyh sit, ku karjalazien kylien palvelut ollah ylen “lieväzet” libo niidy ei ole nivouse. Sanommo, kyläh tulluh gost’u ei sua ičele syödäviä da juodavua kerran tuli muite vai käymäh, ei omilluo sugulazilluo, kus händy ollah jo valmehet ottamah vastah. Autoloil kävijöile ei ole kus huoldua omii rattahii, pagizemattah yön olendua.

Nuoren yrittäjän škola tänä kezän olis juuri alguajih nähte. Se on ilmaine. Edusija on vieljärveläzien, ga ku ken tulolazis hoidau ičele yöpuun täkse aigua, tulgua terveh! Ruvetah opastamah dai samal työnyttämäh uuttu projektua – Karjalan Kielen Koin pihakahvilua, kudai avatah Koin roindupäiväkse 29 heinykuudu. Suurin vuitti opastustu roih internetan kauti. Ihan selgiesti sanellah kui registriiruija oma biznessu, kui oigeih maksua verot, mi dielo kudamahgi kohtah pädöy, midä pidäy tiediä konzu syötät-juotat-magaitat gostii, kui novvata puhtahuttu da tämänmostu. Suavut tiijot da nerot pätäh vältämättäh ei vai oman firman avates, a muitegi rahvahanke hyväs sovus olles. Tulgua terveh, nuorižo!

Škola ruadoaigu: 9.07.–29.07

Suaha yhtevytty meih voitto Koin vk:n joukon kauti: vk.com/public46199459

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat