Vienan Karjala

Kirjutukset vienankarjalakse

Santeri Kuikka: Kino vai teatru?

Santeri Kuikka (toine hurualpäi) Gunnar-roulis Sildu-fil’mas.

Oraskuul НТВ-kanualal ruvettih ozuttamah uuttu detektiivusarjukuvua “Most” (“Sildu”), kuduas suau nähtä karjalastu teatru- da kinoartistua Santeri Kuikkua. Tiijustimmo Santeril, oligo mieldy myö yhtyö Sildu-kinoprojektah, da mil kino eruou teatras hänen mieles.

 “Sillas”ozuttelet Gunnarua, estounielastu politsiimiesty da pagizet eestikse. Ongo vaigei paista kinos vierahal kielel?

– Tavan mugah kinos ozuttelen suomelazii, paista suomekse on ihan helpo. Ga paista kinos tundemattomal kielel, kui se oli “Sillas”, on aiga vaigei. Huolimattah sih, ku eesti on suomen lähisugukieli, sil on vaigiehko paista. Erähäs fil’mas kai olin latvilazen roulis, pidi paista ven’an da anglien kielil latvien aktsentanke! Opis vai duumaija!

 Kusbo piettih Sildu-sarjukuvan sjomkoi?

– Olin Piiteris da Tallinnas. Enimät stsenat kuvattih talois, kus oli minun personuažan ruadokohtu. Kai vehkehet täl stolal minä azetin iče, himoitti omil käzil valmistua tovellistu ruadoatmosfierua.

 “Sillas” olit epizoudois yhtes Ingeborga Dapkunaiten da Mihail Porečenkovan kel. Oligo mieldy myö ruadua kuulužien akt’ouroinke?

– Ingeborga on muailman kuulužu artistu, ga myö piimmö yhtevytty ihan prostoih tabah, hänel ei ole nimittustu “tiähtilöin taudii”. Mihail on piiteriläine akt’ouru, häi on ellendettävy da läheine ristikanzu minule. Myö emmo ruvennuh dovarišoikse, ga yksikai oli mieldy myö ruadua yhtes.

 Mittumah kinoh tahtozit yhtyö tuliel aigua?

– Tahtozin yhtyö histouriellizeh kinoh, sanommo, Jekaterina II aigua. Olis mieldy myö panna piäle senaigazet čomat ruutat. Tuliel aigua opin suaja rouli nengozeh kinoprojektah, kačommo, midä täs rodieu.

 

Santeri, sinun mieles, mil taval kino eruou teatras?

– Kino da teatru ollah eri muailmat, kudualois on omat siännöt. Teatras ei sua “kiänyttiä” pl’onkua järilleh, teatru on “elävämbi” kinuo. Kinuo minä voizin verdailla biiseran nieglomizeh, moine se on hieno ruado...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Lugijan mielii
Partn`ourat