Vienan Karjala

Kirjutukset vienankarjalakse

Vienan Karjalan istorijašta ta nykypäiväštä

Arvo Tuominen (enšimmäini oik.) vierailomašša Santerin Lesosen luona Venehjärveššä. // Kuva: Arto Rinne

Kešäkuušša Kalevalan piirissä vieraili Šuomen TV:n enšimmäisen kanavan toimittaja Arvo Tuominen. Toimittaja valmistau dokumenttifilmie Vienan Karjalašta road movie -tyylissä. Kuvaušmatka kešti yhteheš kymmenen päivyä, 19.–29. kešäkuuta, kumpasien aikana Arvo Tuominen oli käynyn Kalevalan, Kemin, Belomorskin piirien ta Koštamukšen kaupunkipiirin kylissä.

Ennein Kalevalua šuomelaini kuvaušryhmä kävi Jyškyjärveššä, Vuokkiniemeššä, Venehjärveššä. Piirikeškukšešša Arvo Tuominen kuvasi jutun Mobergin talošta, min tiloissa nykyjäh šijoutuu Kalevalatalo-etnokulttuurikeškuš, šekä tapasi paikallisen toimittajan, taiteilijan ta kotišeuvun istorijan tutkijan Andrei Tuomen. Šuomelaista journalistie kiinnoštau, mitein nykyajan ihmiset käsitetäh Vienan Karjalan istorijua, mimmoni ašema on nykyjäh karjalan kanšalla ta mitein tavalliset kyläläiset eletäh tänäpiänä.

Arvo Tuomisen filmilöissä istorija ta nykyisyš aina kietouvutah toini toiseh. Hiän on jo moničči käynyn kuvuamašša Venäjällä ta Karjalaššaki. Tuomisen luomisšiäštököššä on filmijä Vienanmeren kanavašta, Onegan, Luatokan ta Svir-joven matoista. Toimittaja aina eččiy mukavie pakinatovarissoja, kumpasilla on omaluatuni kanta Karjalan istorijah.

Kuvaušryhmä oli Kalevalašša kakši päivyä ta šen jälkeh jatko matkuah Puanajärven kyläh ta šieltä Solovetskin šuarilla. Filmin kuvaukših otti ošua tunnettu karjalaini folkmuusikko Arto Rinne. Filmi on šuunniteltu esittyä Šuomen TV:šša šykyšyn alušša.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat