Vienan Karjala

Kirjutukset vienankarjalakse

Kyykän onnie antamašša

Giulia Italijašta ahkerašti staraičči lyyvvä hoti yksi kyykkä čeristä, ka harvan ihmisen lyönnit šujutah enši kerrašta. // Kuva: Natto Varpuni

Muasteri-oppih ošallistu kahekšan henkie Italijašta, Šakšašta, Itävallašta, Enklannista ta Čekistä. Alukši Kyykkäliiton neuvošton jäšen Natalja Vorobei näytti I.K. Inhan kyykkä-kuvie ta kerto pelin istorijašta, vehkehistä ta šiännöistä. Šiitä kyykkäliiton johtaja ta kokenun peluaja Jevgeni Karakin näytti kuin pitäy oikein heittyä kyykkäpualikkua, jotta ei venähyttyä kiän lihakšie. Šiitä alko kunnon peli – ošanottajat jakauvuttih kahteh joukkoh ta ruvettih heittämäh pualikkoja.

– Kyykkä muissuttau boulingi-pelie, šano Giulia Italijašta, ka še on jykiempi boulingie. Mie en heittän yhtäkänä kyykkyä čeristä. Kuitenki vesseläšti vietin aikua omien kaverien kera.

Ulkomualaset opaštujat opaššutah venäjän kieltä Petroskoissa kanšainvälisen ohjelman rajoissa. Päivän huomenešpuolella heilä on kielen opaššušta, iltapuolella ulkomualasilla on tarjolla kulttuuriohjelma.

– Myö järješšämmä ulkomualasilla venäläisen ruuvvan illaččuja, kylyh käyntie, näytämmä heilä Karjalan nähtävykšie, käytämmä heitä musejoissa ta teatteriloissa, ohjelman kurattri Anastasija Bal’akina kerto. – Toičči ni perehet, kumpasissa ulkomualaset eletäh, taritah heilä omua ohjelmua, esimerkiksi, otetah opaštujie omilla dačoilla ta annetah heilä mahollisuš kuot’ella mimmoista še on dačamiehen elämä. 

Muasteri-opin lopukši Kyykkäliiton aktivistit kučuttih ulkomualasie jatkamah kyykän peluamista omah muah myöššyttyö. Vet’ kun kyykkä levinnöy 50 mualla ta kolmella manterehella, šiitä voit tulla Olimpijakisojen laji. Ulkomualaset annettih lupa kehittyä karjalaista pelie omilla paikoilla.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat