Vienan Karjala

Kirjutukset vienankarjalakse

Ruado eistyy edeh sovus olles

Vastavuksele ministru Sergei Kisel’ovan kel kerdyi kandurahvahien yhteiskunnallizih liittoloih kuulujua aktivistua. // Kuva: Ol’ga Dubitskaja, “Oma Mua”

Uuzi avain on ečittävy stuatusan suandas

– Meijän piätavoiteh on ruadua rahvahan liittoloinke da enne kaikkie kehittiä Karjalan kandurahvahien elaigua parembah puoleh. Minus ičes on alavozelazien alguperiä, hyvin tunnen kylärahvahan elaijan”, mainičči mennyt vuon virgah miärätty Sergei Kisel’ov, Karjalan syväinazieloin endine varaministru.

Häi pahoi uskou sih, ku karjalan kielen dielot eistytäh perehis da kois pagizemata. Valdivollizen stuatusan suandua häi pidäy ylen jygienny kohtannu, hozi ei kiellä karjalazii rippuo täs.

Meil yhtes pidäs löydiä mitahto uuzi avain täh, sanoi vastavundal ministru.

Stuatusan suandan kibien dielon tuaste nostatti Tatjana Klejerova, karjalazien VIII kerähmön vallittuloin nevvoston paginanvedäi:

– Meil se on pandu rezol’utsieh, emmo voi olla sidä eistämätä mindäh sendäh olemmo vastuollizet kaikkien karjalazien ies, pagizi inehmine. Mennyön vuvven aigah oli opittu eistiä edehpäi se kyzymys pidäjen ynnällizen konferensien da nevvottelut azientiedäjienke.

Vepsäläzii on kannatettu Ven’an vähäluguhizennu kandurahvahannu olles. Suadih kohendua Šoutjärven bol’ničču da škola, piettih heijän rahvahallizii pruazniekkoi da jullattih vepsänkielisty kniigua.

Piädokluadan pidäi ministerstvan kandurahvahien valdivollizen kannatuksen ozaston piälikkö Jelena Migunova kiitti Priäžän administratsiedu hyväs aloittehes. Hyö otettih käyttöh karjalankielizet blankat, kudamien kiännändäs ylen äijäl avvutti sanastokomissii. Muite ga Jelena Migunova potakoičči kaikkii karjalankielizii nimilöi virrallizeh käyttöh ottajii olla huolekkahembannu da kiändyö sanastokomissien puoleh. Ilmai sidä rodieu äijy hairahtustu...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat