Vienan Karjala

Kirjutukset vienankarjalakse

“Kalevalan” päivinny

Kalevala-eeposale omistettu vastavus piettih Anuksen Kanzallizes kirjastos. Kuvas on sen ruadai Galina Fedulova. // Kuva: Valentina Libertsova

“Kalevalan” vuozi kerras tembai omah pyörindäh. Vikse kerävyi mieldy, kuvua, sanelemistu sih vahnah da tärgieh kniigah nähte. 

“Kalevalan” kauti eläjät

Kaksi vuottu tagaperin Kalevala-open -projektan mugah rahvas vuorokkai lugiettih eriluaduzil kielil eeposan runoloin katkelmii da net tallendettih, sit nygöi net voibi löydiä verkos da kuunnelta. Projektan todevuttajannu oli Irina Rinkevič. Naine valmistigi ozuttelut da kižan “Kalevalan” pohjal. A kaikis mieldykiinnittävin oli, konzu mulloi joga ildua häi kirjutti mitgi sanat “Kalevalaspäi”, pättävät sen päivän tapahtumih. Nygöi naine painau Bel’skoin kiändämizen sellityksii da kohendamizii. Häi eläy “Kalevalan” kauti. Vaiku ven’akse kirjutetun.

Tänävuon miellyin online-tiedokilbah “Kalevala 1849”, kuduan pidi Opastuksen kehitysinstituuttu. Tiijustin, sen azui Ol’ga Hramtsova, häi sežo on “Kalevalan” kauti eläi. Häi azui oman saitan “Kalevala La-la-la-la”, dai kyzymyksii myö nägyy: syväh tiedäy eeposan.

Kevätkuun 2. päivänny on meijän taidoilijan Tamara Jufan roindupäivy. Hänen piirustettuloi kuvii kaččojes ovvostelet, kui Aino da toizet eeposan naizet pohoditah häneh nuorete! Vikse ruavon aigua taidoilii hyvin tiijusti omien personuažoin mielii, ku ičegi “puutui” omih kuvih. Se on ihan “Kalevalan” kauti eländy. 

Taratammo karjalakse “Kalevalah” nähte

Vie yhtenny “Kalevalan” kauti eläjänny voibi pidiä liygilästy Galina Fedulovua, Anuksen Kanzallizen kirjaston kodirannan literatuuran ozaston piälikkyö. Kevätkuun enzimäzenny pyhänpiän häi kučui liygiläzii tarattamah muamankielel “Kalevalah” nähte. Kuda-midä kyzeli, mustoitti piähengien nimet. A sit gu rubei lugemah da sellittelemäh ottehsanoi meijän livvikse kiännetys “Kalevalas”, agu äijän tiijustimmo da mustoitimmo vahnembis kuultuloi mielii, kuvii, viizahuksii, tiedoloi, ennustuksii, kuduat pätähgi nygyaigazes elaijas. Zinaida Dubininan livvikse kiännetty “Kalevala” on täyzi sivumerkii Galina Mihailovnal. Galina Fedulova löydi moizen hyvän uvven fil’man, kuduas ozutetah, mittuine ammuine on meijän eepossu, runot roittih moizel loittozel aijal, konzu vie torattih vai tiedovoloil, tiedoloil da tiedohussanoil.

Vera Larionova šeimii kaikenjyttysty muarju- da nižupiiraidu, lugi oman uvven juumorurunon “Peša-izmenšiekku”, nagratti meidy. Kaikin saneltih omien kylien kuulumizii, pačkettih hieruloin da vahnoin ristittyzien hädii, ihasteltihes, ku kevät on tulemas, toivottih uuttu vastavustu...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat