Vienan Karjala

Kirjutukset vienankarjalakse

Olla abuniekannu kyläläzile

Galina Spiridonova alalleh yhtyy subbotniekkoih. Häi mielihyväl luadiu uuzii kukkuvagoloi enne kyndämättömäh muah.

Galina Spiridonova on Priäžän piirin kunnivoittuloi eläjii, kudualoi ei ammui hyviteltih Priäžän kul’tuurutalois. Täs hyväs inehmizes saneltes mustokse tulou fil’mu “Операция Ы”. Fil’mas on moine kohtu: militsiimies sanou ruadoloi, kudamih pidäy abuu. “Hyvät rahvas!”, sanou häi. – “Ken tahtou ruadua?” Ielleh häi sanou, mittumat ollah ruavot: sevoittua tsementua, ruadua čuurukarjeeras, gruuzie hiildy. Joga ruadoh on yksi sama himoiniekku. Häi harpuau askelen edehpäi da sanou: “Minä!”. Häi ei varua nennii jygielöi ruadoloi. Moizii joga ruadoh tartujii da abuh tulijoi ristikanzoi on Nuožarveläine eläkkehel olii Galina Spiridonova. Ei petties Nuožarven kylän administratsii juuri händy kehoitti vuvven 2018 laureatakse. Kirmei jallal inehmine uskou vaiku hyväh da ainos on valmis avvuttamah rahvastu. Kaikin voijah opastuo hänes.

Nuožarveh häi tuli 1970-luvun allus vie neidizenny. Sie häi meni miehele, pereheh rodivui kolme poigua. Lapset kazvettih, rodivuttih bunukat. Galina Spiridonovan ainavonnu ruadokohtannu oli Nuožarven meččylaitos, kus häi 36 vuottu ruadoi meččytalovuon tehniekänny. Voimattomuon periä pidi jättiä ruado. Liäkärit pandih pahan diagnozan. Ga inehmine ei “katkennuh”, sanoi: “Pidäy eliä”. Väit hil’l’akkazin kiännyttih da niilöinke tuli himo eliä ielleh. Omah igäh kaččomattah Galina on ylen ravei ristikanzu. Häi pajattau Koivuine-pajojoukos. Pajattajat ei istuta joute, ainos ollah ajeluksis, ei ammui käydih Udmurtieh. Galina Nikolajevna ehtiy kaikkiel: häi on veteruanoin nevvoston piälimäine da Nuožarven kylän deputuattu... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat