Vienan Karjala

Kirjutukset vienankarjalakse

Saimmo hyvän opastajan

Enzirivis ollah yhtes pertis ruadajat Nikolai Filatov, Aleksandr Jeremejev da Nikolai Nazarov.

Endizel raadivon ruadajal, minun kolleegal Nikolai Petrovič Filatoval 28. kevätkuudu täyttäy 80 vuottu. Kaikes sydämespäi hyvittelen “Fil’oin Miikulua”, smietin, jogahine Karjalas eläi kuuli tämän nimen raadivos mondu kerdua suomen dai karjalan kielel. Toven tiijän, ku karjalazet hyväl himol vuotettih hänen raadivopaginoi da TV:n lähetyksiigi.

Žiäli, gu vähättävy ozavui ruadua hänen kel yhtes ‒ vaiku kaheksa puolen kel vuottu. A buitegu kogo ijän tunnen Nikolai Petrovičua, moine on hyvä ristikanzu, nygöigi toiči midätahto nevvou da viegi kodih minuu suattau-hurahuttau omal mašinal. Suuret passibot kaikes hyväs!

Ruavos minul lykystih opastuo karjalan kieleh hänengi avul. Ennevahnas sanottih: “Gu et maltane paista, opastu kuundelemah”. Fil’oin Miikulan kel istuimmo yhtes pertis da ainos sai kyzyö kiändiä livvikse mittuinetahto jugei ven’an terminu. Toiči iče kyzyy muheloittajen: “Miikul, kohota korvat, mibo on ylähine da mibo on viihtinpuu; misbo on eruo mähändän da möykyn välil; toine sanapuaru ‒ ildukečoi da illačču; a salvattu da salvatettu? Tiettäväine, kaikin ymbäri nagretah, gu en voine oigieh vastata…

Raadivos Nikolai Petrovič Filatov rubei ruadamah toimittajannu äijiä enne minuu, vuvves 1972 algajen. Nikolai Petrovič magnitofonan kel kahteskymmenes seiččemes vuvves ajeli meijän Karjalan ristin-rästin! Joga kyläs händy mustetah dai mustellah hyväl sanal da ainos nagran, konzu rahvas minuugi erehtykses nimitetäh Nikolai Petrovičakse. A nagran vie sen periä, gu Leninal häi ezmäine peittonimi Peterburgas parahite oli “Nikolai Petrovič”! Smietin, vahnembal meijän redaktoral, kunnivoitul žurnalistal vois ylbeillä sidä ‒ häi omal aijal kuului kommunistoin partieh, hyväl sydämel uskoi kommunizmah…

Vältämättäh pidäy mainita, ku vuvvennu 1994 Nikolai Filatoval on annettu kunnivonimi “Karjalan arvostettu kul’tuuran ruadai”. Nelliä vuottu myöhembi häi sai vie kunnivomerkin “Ven’an Federatsien kunnivoittu radistu” da kunnivogramottua hyväs ruavos sai vägitukun... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat