Vienan Karjala

Kirjutukset vienankarjalakse

Vahnu fotokuva

Porajärven školan 4“B” kluasan opastajat, vuozi 1965. Keskes ollah školan johtai Tatjana Nikolajevna Mareš (oigiel) da opastai Vera Vasiljevna Zigangirova

Porajärven kaheksankluasan školan fotoal’bouman sivuloi livailtes huomain yhten kuvan. Kuvas oldih Tatjana Nikolajevna Mareš da Vera Vasiljevna Zigangirova, heis ymbäri seizottih lapset pionierugalstukois. Moizet tutut da jo läs viijenkymmenen vuvven mendyy vie armahembikse roinnuot kazvot. Kui sanotah, moizil hetkil piäh tuldih mennyöt aijat. 
Oli lämmin syvyskuun päivy. Tottu paisten, meile vie huondeksel sanottih, ku meijän opastai voibui da urokkoi nelländes kluasas rubieu pidämäh toine opastai. Enzimäi kai oli kui pidigi olla: kirjutimmo, luvimmo, vaikkani kuundelimmo, ku hänen kluasan lapset ollah kymmendy kerdua mielevembi meidy, da semmostu... Pitkäl väliaijal kižain jalgumiäččyh 4“B” kluasan brihaččuloinke. Hyö huondekses potkittih miäččyy jalloil da ajattelemattah omua suurdu mieldevytty lyödih sidä piälöil, opastuohäi pidi toizeh vuoroh. Soitti kelloine. Minä juoksujalgua tulin urokale, avain uksen kluassah... 
– Nuori briha, salvakkua uksi! 
Seizon uksen luo tyhjas kalidoras, piäs pyöriy, midä sanon muamale, ga silkeskie kačon ‒ vastah astuu školan johtai Tatjana Nikolajevna. Käis hänel ollah kluasan päivykirju, ozutin da tukkuh kiärityt kartat. 
– No midä, Sergei, urokalego myöhästyit? Pie kartat käis. Minul tänäpäi on kaksi histourien urokkua kuvvendes kluasas, ethäi kieldävy tulemas niilöile? 
– Ičegi näin, ku tahtot lähtie urokale. Älä pie pahua mieldy, nosta nenä yläh, minä pagizen opastajanke... 
Tulimmo kluassah. Sie oli moine hil’l’u. Minule ozuttihes, buitegu kuuluu, kui tiketetäh čuasut Tatjana Nikolajevnan käis. 
– Sergei, istoi Niinan tuakse ikkunalluo. 
Vie kerran kyzyi: 
– Etgo tahto lähtie iäre? 
Kuibo minä voin kieldävyö, konzu vie toizes kluasas opastujes kai suarnuneidizet pohodittih vai täh tyttöh, minun dovarišan vahnimah sizäreh, kudamanke vastevai kižaimmo miäččyh. Istuimmos sinne, kunne käski opastai...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat