Vienan Karjala

Kirjutukset vienankarjalakse

Tulgua Kindahah kuundelemah zuakkunoi

Julija Tolmačova Daniil-poijanke ozutetah gost’ale, kui kindahalazet mužikat pandih piäle štanit. // Kuva: Kuva on otettu vk.com/kindahat

Kindahat-projektu pandih rattahile mennyt vuon kezäl. Silloi kaksi Priäžäs eläjiä nastu – Svetlana Hrebtova da Julija Tolmačova – piätettih, ku pidäy pidiä ekskursieloi Kindahan kyliä myöte.

Naizet jo mondu vuottu ruatah etnokul’tuuran alal, joga vuottu järjestetäh Juumoran pruazniekkua Kindahan kyläs.

– Eräs meijän tuttavu andoi meile pienen taloin Šuojun joven rannal Kindahan kyläs. Myö panimmo sen kundoh, kerdoi Kindahat-projektan alguhpanii Svetlana Hrebtova.

– Meil Karjalas on čoma luondo. Kinnermän, Kižin suaren, “TalviUkon” kel emmo voi kilbailla, sendäh piätimmö, ku pidäy olla muite karjalazinnu, tovellizinnu Kindahan karjalazinnu, jatkai naine.

Kindahat-joukko pidäy ekskursieloi Kindahan kyliä myöte Kindahan zuakkunoin pohjal. Toiči Kindahan kyliä sanotah “ylivaldazekse valdukunnakse”, sendäh “valdukunnan rajanvardoiččii” prižmiy matkailijoil pasportoi da viizoi.

Ekskursiel Julija Tolmačova ozuttau matkailijoile perindöllizii karjalazii soittimii. Vie matkailijoinke kižatah karjalazih kižoih, tansitah, juotetah heidy čuajul, sanellah da ozutetah kogo Karjalas kuulužii zuakkunoi Kindahan mužikkoih nähte.

Kindahat-joukko kirjutti Kindasovo – povorot k novoi žizni -projektan (Kindahan kylä – muutos uudeh elaigah päi) Prezidentan grantoin fondah da voitti sen grantan. Tämän projektan hantuzis Kindahan kyläh avatah Kindahan zuakkunoin pohjal luajittuloin puuvestoksien parku. Terväh nägöy päivänvalgien kaksikieline Kindahan zuakkunoi -uvvistettu kniigu.

– Terväh myö suammo kniigupainamos Kindahan zuakkunoi -kniigan. Tämä kniigu rodieu kahtel kielel – ven’akse da karjalakse. Kniigan prezentatsii kačommo pidiä kezäkuus Karjalan Kanzallizes kirjastos, saneli Svetlana...

Kaččuo ližiä tieduo da kirjuttuakseh ekskursieh voibi internetas adresil vk.com/kindahat.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat