Suomelas-ugrilaine urhomies kielien avukse

Seminuaru järjestettih Elävy kieli -art-projektan hantuzis, kuduan tarkoituksennu on säilyttiä häviemäs olijoi suomelas-ugrilazii kielii komiksoin avul. Suomelaine taidoilii Sanna Hukkanen opastau rahvastu luadimah komiksoi kanzallizil kielil.

Seminuarah yhtyi rahvastu Komis, Udmurties, Hanti-Mansien avtonoumizes okrugas, Leningruadan alovehel da toizis čuppuloispäi. Pivon aigua aktivistat paistih sih nähte, kui voibi kehittiä kanzallizii kielii.

Antti Naulainen kerdoi Meččyškola-projektah nähte, kuduan mugah nuoret luajitah suomelas-ugrilazii fil’moi kanzallizil kielil. Mennyt vuon kinoluageri piettih Hanti-Mansien avtonoumizen okrugan Kazim-kyläs. Lyhytaigazien fil’moin vuoh voibi prostoih tabah kerduo omas kul’tuuras da kieles.

Mieldykiinnittäjis projektois Karjalan tazavallas saneltih Petroskoin valdivonyliopiston opastui da vepsänkielizen raadivon toimittai Darja Švetsova da Oma Mua -lehten toimittai Elina Potapova. Kielipezäs Vieljärves kerdoi karjalaine aktivistu Natalja Antonova.

Sit, midä luajitah karjalan kielen hyväkse Suomen puolel, kerrottih aktivistat Ilja Mošnikov da Risto Salmela.

Udmurtija-julguamon ruadai Georgii Gr’azev saneli stolakižois lapsih niškoi. Miehen mielen mugah, stolakiža on huovis da mieldykiinnittäi taba opastua kieldy lapsile...