Tytit sežo paistah karjalakse

Petroskois 31.05.-4.06. piettih IX tazavallan lapsien da nuorižon tyttiteatroin Kuklantida-festivuali. Sen alguhpanijannu on Karjalan Tyttiteatru. “Kuklantidua” pietäh joga tostu vuottu 2003 vuvves algajen. Se on suurin lapsien ei-ammatillizien teatrujoukkoloin pido Karjalas.

Tavan mugah Kuklantida-festivuali avatah lapsien puolistuspäivänny – 1. kezäkuudu. Tänävuon se avattih aijembi sendäh, ku pyrgijiä festivualih liženi.

Tänävuon festivualin deviizannu on “Karjal on suarnoin da zuakkunoin mua”. Sen tiemannu on karjalan folklouru – suarnat da zuakkunat da Kalevala-eepossu. Festivuali on omistettu Karjalan tazavallan 100-vuozipäiväle da Kalevala-eeposan tävven kniigan painamizen 170-vuozipäiväle.

Tänävuon Kuklantida-festivualih tuli lastu Karjalan eri čuppulois: Petroskois, Kalevalas, Värtsiläs, Priäžäs, Jessoilas, Anukses, Rukajärves, Vieljärves da Sordavalaspäi.

Festivualis sai kaččuo “Mustua sorzastu”, “Sinipedrua”, sai tiijustua, “Mindäh vezi meres on suolaine”.

Tervehtimäh lapsii festivualin avajazih tuli Karjalan Kul’tuuruministran sijahine Sergei Solovjov.

– Enzimäi tahton hyvitellä teidy pruazniekoinke. Tänäpäi on Kul’tuurualan ruadajan pruazniekku, a huomei – Lapsien puolistuspäivy. Teil festivualis on suuri da mieldykiinnittäi programmu. Duumaičen, ku työ lövvättö uuzii dovariššoi da suatto äijän uuttu tieduo teijän tulieh ruadoh, sanoi Sergei Solovjov...