Vienan Karjala

Kirjutukset vienankarjalakse

Hämienlinnas piettih Karjalaine kezäpruazniekku

Jelena Kurki opasti karjalakse Sina Burtsoffile, kui azutah varoi-luajilmustu. // Kuva: Heini Karjalainen

Mennyt nedälil suovattan da pyhänpiän Hämienlinnas piettih Karjalaine kezäpruazniekku. Pruazniekkua on pietty joga vuottu alalleh vuvves 1949, da tänävuon sille rodih jo 71 vuottu. Karjalan Liiton da Suvi-Hämien Karjalazien seuroin piirin organizuittu pido keräi yhteh tuhanzii karjalazii da karjalažuos kiinnostunnuzii muan eri čurispäi. Pruazniekan programmas ollah iellehgi pyzytty juoksendukilbu, piiraikilvat, hengellizet pivot da karjalazien čoma värikäs kulgoveh. Aijan aloh pruazniekkua on uvvistettu da tuodu nägövih eläviä da uvvistujua karjalažuttu. Äijile ristikanzoile Karjalaine kezäpruazniekku on kezän paras pido.

Karjalan kielen Seuru sežo oli kezäpruazniekas da paiči muudu otti ozua karjalan kielen pajah sego karjalazeh torgukohtah. Karjalan kielen paja piettih yhtes Karjalan Liitonke.

Karjalan kielen pajas puutui nähtä eriluadustu rahvastu. Sih kävyi nuordu dai vahnembua, karjalastu dai suomelastu, kieldy enzimästy kerdua kuulijua dai kielenmaltajua. Äijäl kosketti yksi vie sillozes Raja-Karjalas roinnuhes karjalaine buabo, kudai kyynälet silmis lugi omal kielel enzimästy kerdua juuri täs pajas. Ylen nagratti eräs brihačču, kudai kyzyi:

– Tarkoittaako tämä “pastau päiväine” pastaruokaa päiväksi?

Karjalan kielen pajas kuului vesselii karjalazii pajozii, kudamih opasti Kristiina Olanto. Pajopidozeh hyväl mielel yhtyttih kui yskyniekat, mugai buabat da died’oit. Pruazniekas sežo reklamiiruittih sygyzyl ilmah piäzijiä uuttu lapsiendiskua “Metrolla buabon luo”. Diskan piästäy ilmah Karjalan Kielen Seuru, da sit pajattau Kristiina Olanto yhtes oman Lekkujad-yhtyvehenke...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat