Vienan Karjala

Kirjutukset vienankarjalakse

Karjalašša kuvattuja elokuvie

Aleksandr Mihailov Rakkahuš ta kyyhkyset -kinon kuvaukšissa. // Kuva: Aleksandr Karel’ski

Vuotena 1926 Karjalašša oli kuvattu enšimmäini mykkä elokuva. Še oli ohjuajan Oleg Frelihin Jiänlähtö (Kakši šavuo) -filmi. Šiitä oli kuvattu ni enšimmäiset iänikinot. Niijen luvušša voipi mainita ohjuajan Rafail Muzikantin Neuvoštoliiton kotimuašta -elokuvan, kumpasešša Toivo Antikaisen roolissa esiinty jo tunnettu šilloin kinoartista Oleg Žakov.

Näyttelyššä on esitetty valokuvie kuin Kanšallisen musejon, niin ni Kanšallisen arhiivan ta Premjer-kulttuurikeškukšen, Taitehmusejon ta Karhumäjen piirimusejon, Pohjois-Luatokan musejon ta petroskoilaisien valokuvuajien arhiivoista.

Niin, ekspositijošta šuau tietyä, jotta 1959 vuotena ohjuaja Aleksandr Ptuško kuvasi Kontupohjan piirissä neuvoštoliittolais-šuomelaisen Šampo-filmin. Elokuvašša esiinnytäh ni meijän Šuomelaisen draamateatterin näyttelijät Darja Karpova, Kuuno Sevander ta toiset.

Šuurin oša elokuvista oli kuvattu Karjalašša 1970-1980-luvulla. Ne ollah Ivan Pirjevin “Loittosen tähen valo” ta Andrei Smirnovin “Kakši hätäpäivyä”, Boris Bunejevin ta Rolan Bikovin “Šorša-kylä” ta Vitali Mel’nikovin “Loma šyyškuušša”, Stanislav Rostotskin “Ta ilta oli rauhallini” ta “Kivilöilläki kašvau puita”, Vladimir Men’šovin “Rakkahuš ta kyyhkyset” ta Aleksandr Proškinin “Vilu kešä 1953”.

Kaikkieštah 93 vuuvvešša Petroskoissa, Karhumäješšä, Sortavalašša, Priäžän, Aunukšen, Kontupohjan, Kemin ta Puudožin piirilöissä oli kuvattu yli 40 kinuo, noin 20 moniošaista filmie šekä hyvin monta dokumentti- ta popularista tietokinuo. Niistä monta piäsi isänmuallisen elokuva-alan “kultafondih”. Vuotena 1972 Ta ilta oli rauhallini -filmi äšen oli ehotettu kanšainvälisen Oscar-kinokilpailun Paraš ulkomualaini elokuva -nominatijoh, ka ei piäššyn voittajakši.

Täštä kertou Kanšallisen musejon näyttely “Kinon aloveh: Karjalašša kuvattuja elokuvie”. Tuttavuštuo šiih voipi elokuun loppuh šuaten.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat