Kandeleh, go!

Kanzoinvälizet kandelehel soitandan kursit piettih Sommelo -rahvahallizen muuzikan festivualin aigua. Kursiloih yhtyi piäl 20 muzikantua Karjalan tazavallas, Suomes da toizil muailoilpäi. Ven’an puoles pidoloih yhtynyzien joukos oli Petroskoin Kantele-taloin artistoi, Petroskoin Aleksandr Glazunovan nimizen konservatourien opastujii da muuzikanopastajii Petroskois, Priäžäs, Anukses, Kostamukses, Šoutjärves da Karjalan toizis čuppuloispäi.

Kursit järjestettih Suomen Runolaulu-akadiemien muzikantan da opastajan Pekka Huttu-Hiltuzen johtol. Kursiloih yhtynyöt nellän päivän yhtyttih master-kluassoih, kuduat piettih Suomen kuulužat kandelehel soittajat da opastajat – Vilma Timonen Helsinkin taidoyliopistos, Hanna Ryynänen Turkun konservatouries da Eva Alkula Tamperen konservatouriespäi. Master-kluasois muzikantat ozutettih kandelehel soitamizen erilazii taboi...

Kursiloih yhtynyzet suadih äijän uuttu tieduo, maltettih toizeh tabah soittua kandelehel. Omii mielii kursiloih nähte saneli Tatjana Trunova, Petroskoin školan n:o 43 muuzikanopastai:

– Enzimäzen kerran minä opin soittua kandelehel piäl 25 vuottu tagaperin, konzu piäzin opastumah Petroskoin konservatourien Suomelas-ugrilazen muuzikan ozastole. Nygöi opastan lapsii soittamah kandelehel kerhol. Kursiloil Kuhmos minä tiijustin äijän uuttu soitandutehniekkiä, sanommo, Hanna Ryynänen ozutti, ku kandelehel voibi soittua “keppilöil”...