Vienan Karjala

Kirjutukset vienankarjalakse

Makovein pruazniekkah mene Šärkijärven kyläh

“Ildukečoin" pajattajat // Kuva: Ol'ga Smotrova

Kezäl Makoveinnu kylbiettih kezoidu, syödih marjua da kalua. Hos ei ole kypsät garbalot Šärkijärven suoloil, ga kalua pruazniekan gost’att ävven vačan syödih. Tänävuon Šärkijärven eläjät vastattih omal kyläpruazniekal loittozii gostii – Uvven Vilgan Ildukečoi-paginkluuban rahvastu. On “Ildukečois” rahvastu, kuduat ollah rodivunnuot Seesjärven rannoil. Omis roindukohtis avtoubusas ajajes saneltih Zinaida da Vasilii Vasiljevat, Tamara Furtseva da kluuban piälikkö Tatjana Kirilkina. Kaikin hyö paistah omaluadustu Puadenen murrehtu.Makovei on Šärkijärven kylän pruazniekku, Luazaris pietäh Il’l’anpäiviä, Prokkoil’as – Sroičanpäiviä, endizen Suondelen kylän kohtal – Kirikönpäiviä, Puadenes – Spuasan päiviä. – Pidämäh tädä pruazniekkua kehoitti meijän Seesjärven rahvahalline hora. Jo enämbi kymmendy vuottu piennä sidä. Natalja Kondrojeva, Seesjärven horan ohjuaju, oli Viola Malmin seminuaralla. Malmil on kirjutettu kai meijän Puadenen čupun tansit, Natajla opastui, kui pidäy pruazniekat nämä azettua. Vie Nataša ajeli Petroskoih arhiivah, ku meile arhiivaspäi annettas dokumentat, kus pruaznuittih, nygöi, tiettäväine, kai on kniigois. Sit tuli, sanoi: “Rubiemmo azettamah. Täs Makovei, Sellis – Juablokkuspuassu”, Luazaris – Il’l’anpäivy. Hora ajelou, i omat rahvas vuotetah, azetetah meile kaikkie, sanou Raisa Taistovna Bogdanova, Seesjärven etnokeskuksen piälikkö.  Nygöi Seesjärven horas on kaksitostu pajattajua, tänävuon hyö oldih pruazniekal, ga ei pajatettu.– Tänävuon ei ole soittuo, emmo puutu nikunne, a muite kezäl olemmo konzu kus – Suondeles, Luazaris, Sellis ammui emmo olluh. Meidy kaikkiele kučutah, ga avtoubussua ei anneta. Tänävuon i Segežah kučuttih, i Suomeh, a ei ole mil ajua, den’gua ei ole...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat