Vienan Karjala

Kirjutukset vienankarjalakse

Karjalan tazavallal – 99 vuottu

Pruazniekan gost’at voidih luadie fotokuvii Ivan Rokačču -ladjal. // Kuva: Ol’ga Dubitskaja, “Oma Mua”

Tänävuon Karjalan tazavallan roindupäiviä piettih Karhumäis. Vihmusiäh kaččomattah linnah kerävyi äijy rahvastu Karjalan tazavallan da Ven’an eri čuppuloispäi.

Linnan kahtestostu kohtas oli histouriellizii da kul’tuurupidoloi, sai kuulta folklouru- da nygyaigazen estruadan muuzikkua da nähtä tansiloi, kaččuo eriluaduzii ruadopajoi da muasteriloin jarmankua. Lapsile da ruavahile oli midä kaččuo.

Pruazniekku algavui Jumalan liturgiisluužbal, kudai piettih Pyhän Il’l’an kirikös.

Lisuha-mäil oli voinu-histourielline Karel’skije rubeži -festivuali, kuduas sai nähtä Suuren Ižänmuallizen voinan bojuloin rekonstruktsiedu.

Sportan suvaiččijat kižattih mini-jalgumiäččyh, tennissah, verkomiäččyh, šahmattoih da kriukkah.

Pienembäl laval sai kuunnella paikallizii pajattajii, kaččuo, kui muiluvezipuzuriloin emändy luadi suurii da pienii muiluvezipuzuriloi da viegi “sytytti” miehien käzii.

Folklouruahol pajatettih da tansittih folklourujoukot, neroniekat piettih ruadopajoi da myödih omii luajilmuksii. Sai ostuagi Periodika-julguamon kniigoi karjalan da ven’an kielel.

Lapsien luomisruavon talois toimi Karjalan tazavallan munitsipualualovehien ozuttelu-prezentatsii “Karelija unikal’naja”, kuduas sai tiijustua Karjalan alovehien histourieh, kul’tuurah, turizmah da tevolliižuoh nähte.

Suurembal laval pruazniekkupäivän aloh kuului pajoloi. Sie ozutettih omua neruo paikallizet Karhumäin muuzikku- da tansijoukot, sego gost’at Petroskois da Karjalan tazavallan eri čuppuloispäi. Pruazniekkuprogrammas oli Kantele-ansamblin konsertu, Karjalan muuzikkuteatran ozutelmu. Niilöile, ket oldih sinä piän konsertal, lykysti nähtä Ven’an rahvahan artistan Aleksandr Mihailovan videohyvittelyt Tazavallan päivänke:

– Terveh teile da hyviä pruazniekkua! On ylen hyvä, ku tänävuon tazavallan päiviä piettih Karhumäis. Minä ylen äijäl suvaičen tädä piendy mielužua linnua da ainos mielihyväl mustelen sidä, sanoi L’ubov’ i golubi (Suvaičus da kyyhköit) -fil’man akt’ouru Aleksandr Mihailov...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat