Vienan Karjala

Kirjutukset vienankarjalakse

Haikol’an elokuvafestivali šyyškuun alušša

Vienan Karjalan Haikol’an šähköttömäššä kyläššä šyyškuun alušša järješšetäh jo šeiččemettä dokumenttielokuvien festivalie. Tapahtumašša esitetäh Vienašša kuvattuja tai vienalaiseh kulttuuripiirih liittyjie dokumenttifilmijä.

Tänä vuotena festivali tariččou kuin vanhoja, niin ni uušie filmijä Vienašta. Nostalgijua herättäjie elokuvie ollah Lisa Hovinheimon dokumentti akatemikko Pertti Virtarannan tutkimušmatašta Seesjärven šeutuloilla šekä Lasse Naukkarisen monen vuuvven aikana kuvattu filmi Puanajärven kylän elvyttämiseštä kylän voimanaisen Annin kautti. Vanhoja filmijä etuštau niise Iikka Vehkalahen, Elina Kataisen ta Peter von Baghin Otto Ville Kuusisešta kertojan dokumentin še oša, kumpasešša käsitelläh Kuusisen hallintokauven vaikutušta Vienah. Šitä elokuvašša arvošti toisien lisäkši ni Ort’t’o Stepanov. Arvo Tuomisen Viena-dokumentissa kačotah starinamaista muakuntua nykypäiväštä tuakšepäin ta esitelläh šen nykytilua.

Jokahisen festivalifilmin esitykšen jälkeh on šuunniteltu pakina nähtyštä elokuvašta. Lopukši jutellah vielä ni koko festivalin ohjelmašta. Festivalin järještäy Haikol’an etnokulttuurikeškuš ta Ort’t’o Stepanovin šiätijö yhteistyöššä Juminkeko-šiätijön kera. Tänä vuotena festivali on pyhänäpiänä 8. šyyškuuta.

Noin 40 kilometrie Kalevalašta itäh päin šijoutuja Haikol’an kylä on kulttuurinähtävyš. Še on šuanun arvoššetun Europa Nostra -kunnivokirjan kulttuuriperintehen šäilyttämiseštä. Kyläštä on kotosin Karjalan kanšankirjuttaja Ort’t’o Stepanov.

 

Ohjelma

9.30 –Käynti Ort’t’o Stepanovin hauvalla.

9.50 – Festivalin avajaiset ta lyhytelokuva Ort’t’o Stepanovista.

10.00 – Lisa Hovinheimo: “Kaunista Karjalua Puatanen puolešša” (Pertti Virtarannan tutkimušmatka Puataneh ta Selkih).

11.00 – Arvo Tuominen: “Tarunhohtoinen Viena” (“Starinamaini Viena”).

12.30 – Päivällini. 

13.30 – Iikka Vehkalahti, Elina Katainen ta Peter von Bagh: “Mieš Varjošša” (Elokuva Otto Ville Kuusisešta).

14.30 – Lasse Naukkarinen: “Puanajärven Anni”.

16.30 – Loppupakinat.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat