Vienan Karjala

Kirjutukset vienankarjalakse

Uuši kouluvuosi alko

Šyyškuun 1. päivä on tärkie tapahtuma koululaisilla, opaštajilla, vanhemmilla. Tänä vuotena Karjalan 204 kouluo otti vaštah 7522 enšiluokkalaista. Niistä 3600 ruvetah opaštumah Petroskoissa. Vuuvvešta vuoteh enšiluokkalaisien miärä kašvau. Kaikkieštah tänä oppivuotena kouluh läksi 71 351 koululaista. Še on 1039 lašta enemmän kuin viime vuotena.

Karjalan, vepšän ta šuomen kieltä opaššutah KT:n yhentoista kaupunkin ta kylän 40 koulušša. Niistä 12 opaššušlaitokšešša opaššutah karjalan ta šuomen kieltä yhtäaikua. A yheššä koulušša opaššutah kolmie kieltä: karjalua, šuomie ta vepšyä. Še on Petroskoin šuomelais-ugrilaini koulu.

– Tänä vuotena 88 enšiluokkalaista rupieu opaštumah šuomen kieltä, nellä – vepšyä ta viisi – karjalan kieltä. Vienankarjalaisešša ryhmäššä on nellä henkie, a livviläiseššä – yksi opaštuja, kerto koulun varajohtaja Jekaterina Ivanova.

Šyyškuu 2. päivänä Petroskoissa piettih perintehellini enšiluokkalaisien kulku, kumpasen jälkeh koululaisie vuotti Enšiluokkani akatemija -pruasniekka konserttineh ta huvineh. 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat