Vienan Karjala

Kirjutukset vienankarjalakse

Kantelen elävällä šoitolla

Musiikkitrollikka-aktijo kekšittih Kantele-yhtyvehen artistat kollektiivin alkuhpanijan Viktor Gudkovin merkkipäiväkši. // Kuva: vk.com/viestitkarjala

Jo monta vuotta Karjalan laulun ta tanššin Kantele-yhtyveheššä eläy hyvä perinneh: joka vuosi šyyškuun alušša kollektiivin ruatajat keräyvytäh yhteh, jotta muissella yhtyvehen alkuhpanijua, esittyä omie šuavutukšie ta näyttyä, mitein nyt eläy kannel-šoitin.

Ihmiset, kumpaset šyyškuun 4. päivänä istuuvuttih 8. trollikkah vuottamatta piäštih Kantele-yhtyvehen ilmaseh konserttih. Eryähät ei ruohittu noušša kummalliseh trollikkah, a eryähät piätäkauten vuotettih juuri “musiikkitrollikkua”, šentäh kun kuultih šiitä uutisista.

Musiikkitrollikka-aktijo kekšittih Kantele-yhtyvehen artistat. Še on omissettu kollektiivin alkuhpanijan ta enšimmäisen taitehohjuajan Viktor Gudkovin 120-merkkipäivällä. Trollikan matka, mi kulki keškikaupunkie, Drevl’ankua, Perevelkua ta Pervomaiski-prospektie myöten, oli valittu ei šattumalta. Karjalan piämiehen Artur Parfenčikovin ta “Kantelen” kollektiivin artistojen alottehešta Petroskoin hallinnon piätökšellä Drevl’anka- kaupunkin ošan rakennuštyömaijen kartalla ilmešty Viktor Gudkovin katu. Vaikka šielä vielä ei ole elintaloja ta šinne et piäše kaupunkin kuletukšen keinoin, ka lähivuosina tilanneh muuttuu.

“Musiikkitrollikašša” petroskoilaiset kuunneltih karjalaista, šuomelaista, venäläistä musiikkie, šuatih tietyä Viktor Gudkovista ta laulua yheššä Kantele-yhtyvehen artistojen kera.

Šeuruavana päivänä, 5. šyyškuuta, Musiikkiteatterin lavalla Kantele-yhtyveh esitti Ilon laulu -galakonsertin. Konsertti, kumpaseh artistat valmistauvuttih koko vuuvven, oli omissettu Viktor Gudkovin vuotispäivällä.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat