Vienan Karjala

Kirjutukset vienankarjalakse

Meliorativnoin lapset opastutah kieleh

Meliorativnoin kylän päivykois on karjalazii ruuttii, kudualoih lapset pietäh pruazniekkupäivinny. // Kuva: Ol’ga Dubitskaja, “Oma Mua”

Karjalan kielen livvin murdeheh lapsii opastau anuksenkarjalaine

Natalja Viktorovna Jefimova. Kieleh opastutah lapset, kudaut jo ollah täytetty nelli vuottu, mostu on 104 hengie. Urokkoi jogahizel lapsienjoukol pietäh kaksi kerdua nedälis.

Huondeksel lapset opastutah uuzii karjalankielizii sanoi da sanondoi, jälles murginua tansitah da kižatah karjalazien tabah. Natalja Jefimova on luadinuh opastunduprogramman kaikkien federuallizien vuadimuksien mugah, hänen programmu sai toizen sijan Tazavallan lapsienpäivykodiloin opastunduprogrammoin kilvas.

Lapsienpäivykois pietäh äijy pruazniekkua, kudualois lapset ozutetah vahnembile, kui hyö maltetah karjalan kieldy da perindölöi.

– Pruazniekoikse myö lapsienke opastummo karjalazien tansiloin elementoi, pajatammo karjalazii da ven’an kielespäi karjalakse kiännettylöi pajoloi. Pidiä pruazniekkoi minule avvuttau muuzikkuruadai Valerija Poplavskaja, sanoi Natalja Jefimova.

Lapsienpäivykois on jo äiijy omua perindöllisty pruazniekkua – “Elettih-oldih muanruadajat”, “Synnynmuanaigu” da muudu. On uuttugi pruazniekkua – kvest-kiža lapsienpäivykoin taloidu myöte, Karjalazet lapset -kilbu.

– Pruazniekas tyttölöil pidi kabaloija tytti, brihaččuloil – iškie nuaglu laudah. Kilvas pidi ozuttuagi oma kodiruado. Tytöt luajittih karjalazii tyttilöi. Brihaččuloil pidi kuduo vyö. Nygöi meil ollah kogonazet karjalazet ruutat lapsih niškoi. Kilvan arvostelujoukkoh kučummo rahvastu, kuduat maltetah karjalakse, kazvattajii da kannattajii, saneli Natalja Jefimova.

Lapset joga vuottu kävväh Karjalaine perti -muzeih Petroskoih, kävvähgi omah Meliorativnoin školan muzeih, kus sežo on äijy perindöllisty karjalastu vehkehty, brujua, pertilomuu, astiedu da sobua.

Natalja iče on luadinuh lapsienpäivykodih karjalazen gorničan. Sie on päčči, stola pertin keskel, skamn’at, suuri čuppu, kätkyt, käzastii, samvuaru da muudu, midä oli joga karjalazes kois...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat