Vienan Karjala

Kirjutukset vienankarjalakse

Suvaija kieldy lapsusaijas

Valerija Jevgenjevna Grigorjeva opastau karjalan kieldy Puadenen školas vuvves 1996 algajen. // Kuva: Jekaterina Gorbačova

Kielet muite vai ei kuolta, net kuoltah sen periä, ku rahvas heitetäh niilöil pagizendan. Puadenen karjalaine Valerija Jevgenjevna Grigorjeva pagizou karjalakse lapsusaijas. Ven’an kieldy häi rubei opastumah kolmevuodizennu, konzu lähti päivykodih.

Puadenen školan loppiettuu Valerija Jevgenjevna opastui ombelijakse. Ammattii myöte häi oli ruadanuh vaiku vuvven, sit lähti opastumah karjalan pedagouguinstituuttah muantiijon tiedokunnale. Sen jälles inehmine ruadoi lapsienkazvattajannu Puudogas da Puadenes, käyttiä muamankieldy ruavos ei ozannuh.

Lapsusaijas Valerijan buabo Tatjana Jevdokimovna Nebrojeva talutteli händy kluubah Seesjärven rahvahallizen horan konsertah. Horas pajatti Valerijan muamah Jelizaveta Mitrofanovna. Buabo da bunukku ainos mielihyväl kuunneltih horan pajoloi karjalan da ven’an kielel. Silloi pajojoukko oli jo kuulužu ei vaiku Seesjärven čupul, ga kogo Karjalasgi. Konzu rodih televiidenii, Valerija rubei kaččomah da kuundelemah armastu pajojoukkuo televiizoras – hora ylen puaksuh pajatti eri festivualilois.

Erähän kerran naine čomis ferezilöis enzi kerdua nouzi lavale pajattamah da tansimah. Nenga 1975 vuvvel algavui pajattajan taival Seesjärven horas.

– Suvaimah omua muadu da kieldy ristikanzu opastuu perehes, sanou Valerija Jevgenjevna.

Valerijan muamah rubei pajattamah horas vie školas opastujes. Horal oli tärgei sija hänen elokses, häi ei vaiku pajatti, häi iče kirjutti pajoloi da keksi tansiloi, vedi konsertuprogrammoi. Rahvas kunnivoittih händy, kyzyttih nevvuogi...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat