Vienan Karjala

Kirjutukset vienankarjalakse

Valamon manasterissa talvellaki kukitah lilijat

Valamon kašvihuonehissa talvellaki on 25 aštetta lämmintä. Kukkie hoitau pappi Mihail. // Kuva: Kuvat otettu: valaam.ru

Viime vuotena Valamon šuarella rakennettih uuši ta nykyaikani kašvihuoneh. Šiinä šuau kašvattua kukkie ympäri vuuvven. Kašvihuoneh on rakennettu uušien tehnologijien mukah, šillä on kakši kattuo, niijen välillä on lämmin ilma. Tämä tehnologija šäilyttäy lämpyö kašvihuonehen šiämeššä eikä piäššä kylmyä ilmua šiämeh. Kašvihuonehešša on 25 aštetta lämmintä, kun pihalla on 15–20 aštetta pakkaista.

Nyt manasterin kašvihuonehissa kukitah lumivalkoset lilijat. Ne ollah Bah-lajin kukat. Kukka-allergisetki ihmiset voijah hyvin näillä kukilla korissetuissa tiloissa. Šentäh joka halukaš voit tulla pitkihki jumalapalvelukših. Valkeita lilijoita kašvatetah juhlallisie jumalapalveluja varoin, kumpasie pietäh manasterin piäkiriköššä ta skiittoissa. Kukkie käytetäh tilojen ta oprasojen koristelušša. Lilijua šanotah Jumalanmuamon kukakši, še on puhtahuon simvoli. Uuvvešša kašvihuonehešša voit kašvattua tuhat tämmöistä lilijua.

Kohta on Äijänpäivän pruasniekka, šitä varoin monahhat jo kašvatetah kukkie. Kukkie hoitau pappi Mihail.

– Myö valiččima ruškeijen kukkien lajit, juuri pruasniekkua varoin, pappi kertou. – Ruškie on Äijänpäivän väri. Pruasniekan koristelušša rupiemma käyttämäh ruškieta värie. Kašvatamma ruškeita lilijoita ta ruušuja.

Kaikista harvimmat kašvikset, kumpasie kašvatetah tiälä ollah smokva tahi insiiri ta kupina, kumpaista šanotah palajakši penšahakši, kumpasešta mainitah Moosesin viiješšä kirjašša. Tämä kašvi tuotih Sinai-šuarelta, missä tähä šuaten on kašvan še penšaš, kumpaista pyhä Mooses näki ta kuvuali: še oli niin kuin tulešša, vain ei palan loppuh.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat