Vienan Karjala

Kirjutukset vienankarjalakse

Tverin karjalaiset: kuni hyö ei hävitty

Presentatijošša Jelena Dovgal’ kerto karjalaisilla omissetušta kirjašta, šen valmistamisešta ta kirjan idejan šyntymiseštä. // Kuva: Ol’ga Fursova

Kirjua varoin Jelena Dovgal’ keräsi tietoja ta elämänkertomukšie karjalaisista. Hänen tytär Anna, kumpani on Venyähen valokuvuajien liiton jäšen, vaštasi kirjan valokuvista ta disainista. Tämä tevoš on kuuvven vuuvven keštänyön ruavon tuloš. Še on omissettu istorijallisilla tapahtumilla, mit tapahuttih yli 400 vuotta takaperin, konša karjalaiset jouvuttih šiirtymäh elämäh Keški-Venäjällä Luatokan pohjoisrannikoilta.

Presentatijošša Jelena Dovgal’ kerto karjalaisilla omissetušta kirjašta, šen valmistamisešta ta kirjan idejan šyntymiseštä. Jelena on šyntyn Kašina-kaupunkissa ta vuoteh 2012 šuaten ei ni tietän, jotta Tverin alоvehella jo monie vuosie on elän karjalaisie.

– Karjalaiset ta heijän pohatta istorija kovašti kiinnoššettih milma ta meijän perehtä, hoti myö iče emmä ole karjalaisie. Vuotena 2013 läksimä enšimmäisellä matalla Maksatiha-kyläh karjalaisien luokše, šaneli Jelena.

Täštä alko šuuri työ. Maksatihan jälkeh oli Kl’učevaja-kylä. Šiitä kyläštä ta šen eläjistä kertou kirjan toini oša. Kaikkiestah tevokšešša on kolme ošua. Kirjan enšimmäini oša kertou karjalaisien istorijašta: mimmoni tämä kanša on, mistä še tuli Tverin mualla. A kolmannešta ošašta lukija šuau tietyä niistä paikoista, missä elettih ta eletäh karjalaiset, ta missä matkuššettih Jelena ta Anna.

Tämä kirja ei ole tiettehellini tutkimuš. Enšin šuunnitelmissa oli luatie valokuva-al’pomi, ka šen jälkeh šynty ajatuš lisätä kirjah tekstijä, täyventyä valokuvie kylistä kertojilla istorijoilla. Šen lisäkši kirjan kautti voit tuttavuštuo karjalan kieleh. Kirjua valmistuas’s’a oli kerätty tietuo, kuin monta karjalaista kylyä oli, kuin monta niitä jäi nykypäivih šuaten, äijänkö ihmistä eli niissä kylissä ennein ta kuin monta karjalaista eläy nyt.

Kirjan painošmiärä on vain 25 kappalehta, ka još löytyy rahua, niin meinatah luatie šen lisäpainoš.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat