Vienan Karjala

Kirjutukset vienankarjalakse

Vieljärveh tahtotah suaja uvvet toppienkuadokohtat

Vieljärveläine Ol’ga Ivanova (keskel) kuhkuttau omamualazii panemah kundoh kylän toppienkuadokohtii. // Kuva: Ol'ga Smotrova

Karjalan Rahvahan Liiton Yhtes myö olemmo vägi -projektan mugah Vieljärven kylän eläjile saneltih, kui voibi perustua kyläh Alovehelline Yhteiskunnalline Ičehalličus. Vastavuksele Karjalan Kielen Kodih tuli Vieljärven kyläkunnan piälikkö Aleksandr Čugai da kylän aktivistoi. AYI:n perustamizes saneli sen alan spetsialistu Natalja Kolokol’nikova. AYI:n hantuzis voibi ruadua kylän hyväkse: kunnostua pihoi, nostua kiža- libo sportukohtat, luadie kul’tuurupivot. Sih niškoi AYI suau valdivollizen kannatuksen – 300 tuhattu rubl’ua, dostalit den’gat – ei vähembiä 10% eläjil pidäy kerätä ičel.

– AYI:n hantuzis voibi pidiä etnokul’tuurizii projektoi da projektoi karjalan kielen hyväkse, sanoi Natalja Kolokol’nikova.

Yhtelläh paiči kielen da kul’tuuran säilyttämisty vieljärveläzil on vie tostugi hommua. Ku ehtitänneh rahvas perustua kyläh AYI:n, sen enzimäzii projektoi vikse rodieu toppienkuadokohtien azettamine. Tänäpäi kai toppienkuadokohtat ollah avvoi, toppii levitetäh kyliä myöte koirat da linnut.

– Sovetskaja-pihal on kaksi toppienkuadokohtua. Net olis hyvä panna yhteh, kohtah kuduas siiriči kaikin kävväh. Sie pidäs olla nelli libo viizi konteinerua yhten levon ual da vie kohtu suurih jättehih niškoi. Konteinerat mualuazimmo eri värilöih, ku tuliel aigua sit vois erikseh panna plastiekkua, luonnollizii jiännöksii da muga ielleh. Uuzi toppienkuadokohtu pidäs olla hyvä da čoma kaččuo, kehittäy enzimästy projektua Vieljärven eläi Ol’ga Ivanova.

Vieljärveläzet jo miärättihgi aijan, konzu hyö kerrytäh yhteh da paistah AYI:n perustamizes da sen ruavos, se rodieu 6. kylmykuudu 17.00 aigah....

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat