Vienan Karjala

Kirjutukset vienankarjalakse

Auta restavriiruija Sonckan koin levo

// Kuva: vk.com/larssonk

Moskovas ruadai histouriiperindön kaiččemizen fondu keriäy jen’gua Sonckan taloih niškoi. Tämä kodi on Kurkijoven kyläs, se on ainavo kuulužan suomelazen arhitektoran Lars Sonckan mustomerki Ven’al.

Kerätä pidäy 228 011 rubl’ua. Nämmä jen’gat pietäh levon tarkastukseh da restauroičusprojektan luadimizeh. Nygöi kattokirpiččylevo on ylen pahas kunnos da voibi kuaduo. Levo on aiga jygei. Se painau vähilleh kaksi tonnua, ku yksi kattokirpiččy painau kaksi kiluo.

Sonckan kodi nostettih vuvvennu 1914 kanzallis-romanttizeh stiilih. Sen ominažuksii ollah paikallizien luonnonmaterjualoin käyttö da koin sulavuttamine ymbäristöh.

Enzimäzenny koin ižändänny oli Kurkijoven muatalovuskorgeiškolan huolenpidäi Karl Sonck, arhitektoru Lars Sonckan sevoitar. Häi eli täs perehinneh viizi vuottu. Jälles tiä eli agronomu Sipilä. Suomen voinan aigua kois ruadoi gospitali. Nevvostoaigua tänne sijoitettih lapsien päivykodi, sit Kurkijoven souhozan vuoziaijallizien ruadajien yhteseländykodi. Konzu vuvvennu 1991 sen osti hallokse nygöine emändy Lidija Ivanova, kodi oli ylen pahas kunnos – ikkunat perretty, lattiet da lait otettu iäre, očas suuri kuadopaikku. Uuzi emändy rubei kohendamah kodii da pani sen aiga hyväh kundoh. Nygöi händy auttau Nikita-bunukku.

Vuvves 2000 Sonckan kodi kuuluu Karjalan vardoittavien mustomekilöin luvetteloh. Täs ruadau ei-valdivolline Usad’ba-kul’tuurulaitos, kus on hotelli da ozuttelu- da vastavustilat.

Min vastah maksau levon restavroičus, tiijustetah äski projektan azuttuu. Kannattua Sonckan kodii voibi histouriiperindön kaiččemizen fondan internetsivul. https://fondvnimanie.ru/project/294/usad-ba-sonka

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat