Vienan Karjala

Kirjutukset vienankarjalakse

Elä, tverinkarjalan kieli!

Seminarin kaikki ošallistujat šuatih Miun harpaukšet karielan kieleh -oppikirja lahjakši. // Kuva: Spirovskije izvestija -lehti

Pimiekuun 8.–10. päivinä Tverin alovehen Spirovon piirin Kozlovon kirjastošša piettih karjalan kielen opaštamisen teemalla omissettu Elä karielan kieli -seminari. Šiih ošallissuttih karjalan kielen opaštajat, kieliklubien ta kerhojen vetäjät, kirjaštojen ta musejojen ruatajat, kielikurššien opaštujat, yhteiskunnallisien järještöjen jäšenet šekä kaikki, ket halutah enemmän tietyä karjalan kieleštä.

Seminarissa oli esitetty kakši uutta tverinkarjalaista kirjua – Miun harpaukšet karielan kieleh: tverinkarielan algukursa -oppikirja šekä L’udmila Barhatovan Oman koin ikkunat -runokirja.

Miun harpaukšet karielan kieleh -oppikirjan luatijina ollah kielentutkija Irina Novak ta karjalan kielen kurššien opaštaja Irina Komissarova. Molommat naiset ollah spirovonkarjalaiset.

– Täh ruadoh meilä mäni moni vuotta, žentäh kun myö panima yhteh tukkuh kaikki omat oppimaterialat da omat tiijot muamonkieleh näh. Kniigašša on 25 urokkua da jogahizešta löydyy uužie šanoida, gramatikkua da tekstoida, on i šanakniiga, selitti kirjan luatija Irina Novak.

– Kniigan ližäkši on audiodiska, kumbazešta šuau kuunnella, kuin pagizou tovelline karielane, kuin paissah nyt karielazet Tverin mualla. Miušta tämä kniiga on ylen hyvä abuniekka kaikilla, ken rubieu opaštumah kieldä, lisäsi Irina Komissarova.

Tämän kirjan mukah voijah opaštuo lapšet, koululaiset, yliopistojen opaštujat tai aikuhiset, ket käyväh opaštumašša kieltä kurššiloissa. Rahotušta kirjan valmistamiseh šuatih Karjalan Šivissyššeuralta ta presidentin granttien šiätijöštä. Oppikirja ilmešty Periodika-kuštantamošša, kaunehie kuvie piirušti taiteilija Anastasija Trifanova.

Seminarin kaikki ošallistujat šuatih uušie oppikirjoja lahjakši. Šen lisäkši kirjat lähetetäh Tverin alovehen kaikkih piirikirjaštoih, missä opaššetah kieltä ta missä näitä oppikirjoja tarvitah. Kirjan luatijat tahotah lisätä kirja internettih, jotta šitä voitais käyttyä kaikki, ket halutah opaštuo tverinkarjalua.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat