Vienan Karjala

Kirjutukset vienankarjalakse

Kieli on miun kotimua

Kilpailun voittajat Polina Sinitskaja (vaš.), Nadežda Rastrigina, Andrei Gorškov, Jelizaveta Makarova ta Galina Filippova. // Kuva: Kuva: vk.com/minnazrk

KT:n kanšallisen ta alovehellisen politiikan ministerijön järještämäh kilpailuh ošallistu alottelijie karjalan, šuomen ta vepšän kielellä kirjuttajie ihmisie. Piäehtona oli še, jotta heijän tevokšet ei oltais julkaistu eri kirjoina tahi kokoelmina.

Kilpailuh otti ošua 14 ihmistä. Hyö työnnettih prousua, runoutta ta lapšilla tarkotettuo kirjailusutta karjalan kielen kolmella murtehella, šuomekši ta vepšäkši. Kilpailun ošanottajien kešen oli Petroskoin valtijonyliopiston Itämeren-šuomalaisien kielien laitokšen opaštujie, lehtimiehie, karjalan kielen opaštajie ta kulttuurialan toimittajie.

Juhlalliseh pitoh ošallistu vuuvven 2016 kilpailun voittaja Anna Usova, hiän luki Vahnu časounu -runon livviksi.

Kilpailušša oli valittu viisi voittajua.

Paraš tevoš šuomen kielellä -nominatijoh oli työnnetty vain yksi työ, šentäh voittajua ei voitu valita.

Paraš tevoš karjalan kielen vienan murtehella -nominatijošša voitti Nadežda Rastrigina. Hiän kirjutti Alajärven viestit -näytelmän.

Paraš tevoš karjalan kielen lyydin murtehella -nominatijošša parahakši piäsi Galina Filippova Sygyzy-runošta.

Paraš tevoš vepšän kielellä -nominatijošša enšimmäisellä paikalla piäsi Petroskoin yliopiston opaštuja Jelizaveta Makarova ta hänen Muštkirj-kertomuš.

Paraš tevoš karjalan kielen livvin murtehella -nominatijošša diplomit šuatih kaksi henkie. Karjalan kanšallisen teatterin näyttelijä Andrei Gorškov šai palkinnon Petroskoi maguau -runošta, a Petroskoin yliopiston opaštuja Polina Sinitskaja oli palkittu Viizastelijat-kertomukšešta.

Voittajien kaikki tevokšet painetah kanšalliskielisissa julkaisuissa, šamoin arvošteilijat neuvottih kilpailijilla lukie omie tevokšie kerholoissa tahi klubiloissa, jotta ihmiset šuatais kuulla niitä omalla kaunehella muamonkielellä.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat