Vienan Karjala

Kirjutukset vienankarjalakse

Santtu Karhun “Electrosampo”

Santtu Karhun Elektrosampo-disku voibi ostua sen prezentatsies 13. talvikuudu. 12+ // Kuva: Timoi Muunne

Tänävuon kuulužu karjalaine pajoloin kirjuttai, enzimäine karjalaine rokkari, Talvisovat-joukon alguhpanii Santtu Karhu pruaznuiččou kolmekymmen vuottu ruandua muzikantannu. Tämän kunnivokse Suomes jullattih uuzi Santtu Karhun cd-disku nimel “Electrosampo”.  

Sidä voibi sanuo muzikantan solodiskakse, ku Karhu on luadinuh “Electrosampon” kahtei gitaristanke F’odor Astašovanke. Uvves diskas on yksitostu akustistu pajuo. Yheksä niis Karhu kirjutti jälgivuozikymmenel. On täs kaksi vahnuagi pajuo – “Huondeskajokses ildassah” da “Syvysharmavus”. Santtu Karhu äijäl suvaiččou omua Karjalua, karjalan kieldy da karjalazii, ga häi ei pajata Karjalas imeläh tabah. Hänen tekstat ollah tävvet irouniedu da mustua juumorua. Hänen pajolois on elävy, čoma karjalan kieli, kudamua enne paistih rahvas joga karjalazes kyläs. Kai pajoloin tekstat on pandu kniigazeh, kudai on yhtes diskan kel.

Uuzi Santtu Karhun disku iänitettih da jullattih Hot Igloo Oy:n da Jyrki Matikaizen, M.A. Casternan seuran, Karjalan Sivistysseuran da Ven’an puolen Nuori Karjala -liiton avul.

Kui kirjutetah Pagizemmo karjalakse -joukos vk-verkos, “Santtu Karhu rodih tundietukse 1980-luvun lopul omal personallizel muuzikal da karjalankielizil pajoloil. Nämmien 30 vuvven aijal Santtu Karhu da Talvisovat-bändi soitettih Suomesgi äijis festivualilois da kluubois da ollah vahnat tuttavat kui karjalazile, ven’alazile, mugai äijile suomelazile. “Talvisovil” on nelli al’bomua, kudamis jälgimäine “Allus oli muna” on piästetty ilmah 2009”.

“Electrosampon” prezentatsii Petroskoil pietäh 13. talvikuudu, 18.00 aigua. karjalazien, suomelazien da vepsäläzien resursukielikeskukses adresil Titovan piha, 3.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat