Vienan Karjala

Kirjutukset vienankarjalakse

Ozutelmu, kuduadu maksau duumaija

Rakkahuš ta kyyhkyset -ozutelmu karjalan kielen vienan murdehel on luajittu Vladimir Gurkinan pjesan mugah. Ozutelman enzi-ildu oli 3. kylmykuudu 2019. // Kuva: vk.com/nationaltheatre

Tulou loppuh Teatran vuozi Ven’al. En voi sanuo, tunnustettihgo teatroin ruadajat valdivon huolet iččeh niškoi, ga teatroin da ozutelmoin kaikkientiettävys da kaččojien arvostandu nouzi toven. Tänävuon puuttuo vuottamattah joudaval ehtäl kuduahtahto Petroskoin teatrah ei sua – liput pidäy suaha kahtu-kolmie nedälii aijemba. Konzu minä olin loppemas Petroskoin yliopistuo nellikymmen vuottu tagaperin, paistih: nengozes pikkarazes linnas kolme teatrua on liijakse, kaččojua ei tävvy. Nygöi teatrua on viizi, a zualat ollah joga päiviä tävvet. Puaksuh voibi rinnal istujis kuulta paginat, kudamis tunnustat tulluzii Moskovas, Piiteris da omis piirikeskuksis da kylispäi ristittyzii, kuduat piädykauti tuldih tädä libo tostu spektaklii kaččomah.

Kanzalline teatru on meijän Karjalan tazavallan ylbevys, vaigu sie suau nähtä ozutelmoi muamankielel. Nygyaigaine ulgonägö, puhtahus da kodikkahus, vällät tilat sydämes, čomat linnan nägö-alat ikkunoispäi houkutellah huomavuo. Dai ozutelmat ollah tavallizet da nygyaigazet yhteltiedy. Artistat kerävyttih nerokkahat da maltajat.

Meijän kylän Alavoizen taigin -teatrustuudien johtai Ol’ga Limarenko piätti Teatran vuvven lopukse kävvä Karjalan Kanzallizeh teatrah da käski suaha liput karjalankielizeh spektaklih. Tiettäväine, “Katrillih” puuttuo ni toivottua ei sua, en tiijä kus da konzu kerras kai liput myvväh, dai meil oli pättävembi puuttuo 8. päivänny talvikuudu.

Rakkahuš ta kyyhkyzet -ozutelmah puuttuo oli vähästy kebjiembi onnuako sentäh, gu kaikin hyvin tietäh meijän mual kuvattuu Vladimir Men’šovan kinuo Ven’an parahien  artistoinke. Sidä puaksuh ozutetah televiizoras. Sit ei tahtota kaččuo uvvessah, varatah – roih atkal. En peitä, oldihgi meil allus moizet mielet verdailla kinonke. Da vie Anuksen piiris meijän livvin murdehel myö emmo muga ammui kaččonuh Videlen Tilkuzet-teatran Rakkahus da kyyhkyzet -ozutelmua. Sie oli nagruo ga nagruo, sentäh gu iče livvin sananluadu on kummakas, sit on irviständiä da riäzitändiä. Onnuako terväh sai ellendiä: tämä Andrei Dežonovan ozutelmu on toine, se on tostu luaduu da meih nähte – meijän puaksuh ozattomah elaigah da kaimavunnuzih tundoloih niškoi...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat