Yle Uudizile karjalakse nelli vuottu

Tuhukuun 27. päivänny Yle Uudizile karjalakse rodih jo nelli vuottu. Tämän aijan aloh Yle-raadivos kuulutah Yle Uudizet karjalakse da Ylen saital nävytäh kirjutukset karjalan kielel. Karjalankielizii uudizii luajitah yhtes Yle Pohjas-Karjala da Karjalan Kielen Seuru. Enzimäzet uudizet karjalakse kuuluttih tuhukuul 2015 Pohjas-Karjalas. Nygöi Yle Uudizet karjalakse ollah jo valdukunnallizet karjalankielizet uudizet da kuulutah kogo Suomes joga nedälii suovattoin. Uudizii kiändäy da lugou karjalaine inehmine – Hiloin Natoi.

Suuret passibot kaikile, ket kuunnellah karjalankielizii radivouudizii da lugietah sego juatah internet-kirjutuksii! Eriže passiboičen kaikkii, ket vastatah Facebook-sivul piettäväh Kuibo parem karjalakse -kyzelyh da nenga vaikutetah uvven sanaston luajindah da nygözen karjalan kielen kehitändäh. Luajimmo nygösty uuttu karjalan kieldy yhtes!