Vienan Karjala

Kirjutukset vienankarjalakse

Anna ičellä lupa luuvva

Larisa Lonskaja on nerokaš ihmini ta mainijo taiteilija. // Kuva: Kuvat L. Lonskajan kuva-arhiivašta

– Konša šie rupesit piiruštamah?

Mie piiruššan lapšuošta alkuan.Enšin milma opaššettih vanhemmat, šiitä opaššuin taitokoulušša ta instituutissa. Nykyjähki še on miun mielehini homma. Parempi šanuo, jotta tämä ruato on miun elämäntapa. Še on šuuri ilo, konša mieliruato tulou šiun työkši.

– Missä šie ruat?

Mie monta vuotta ruavoin Welt-turistifirmašša. Mie vietin muasteri-oppija turistiloilla ta kyläläisillä šekä ruavoin äijän muuta tehtävyä, missä tarvitah taiteilijan mielikuvituš ta käsi. Nykyjäh olen jo eläkkehellä. Miula on kokonaini vaunu vapuata aikua ta mie annan šitä miun mielehiseh hommah. Piiruššan erilaisilla esinehillä, vaikkapa huonehkaluloilla. Iče luajin omaluatusie muistoesinihie ta šiitä mualuan niitä. Tykkyän kuvata luontuo ta eläimie.

– Mitein on parempi šanuo: piiruštua tahi mualata?

– Myö piiruššamma kynällä, värikynällä tahi liitulla. Još pakina on taulušta, niin parempi šanuo, jotta myö mualuamma tauluo. Mie voin mualata erilaisilla mualiloilla, esimerkiksi, vesimualiloilla, voimualiloilla, ka miušta paremmat ollah akriilimualit. Niijen värit ollah kirkkahat, väkövät ta keštäjät. Akriilimualie on mukava käyttyä.

– Onko šiula opaštujie?

– Miula on jo muutoma opaštuja. Miun mieleštä jokahini ihmini on pieni taiteilija, mie vain autan avata šitä kykyö. Miušta tarkeintä on šuaha työštä mielihyvyä ta lahjottua šitä toisilla. Konša ihmini mualuau tauluo hiän rauhottuu, mualien kirkkahat värit ta iče prosessi kehitetäh mielikuvitušta.

– Kerro omista šuunnitelmista.

– Mie tahon kirjuttua bisnessi-šuunnitelman ta ilmottautuo yksityisyrittäjäkši. Tahon avata pienen piiruššuškoulun ta opaštua toisie ihmisie mualuamah tauluja. Jo šykyšyllä mie meinuan kuččuo lapšie ta aikuhisie omah studijoh.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat