Vienan Karjala

Kirjutukset vienankarjalakse

Muamoni johtama tie

// Kuva: Kuvat: L. Gundirevan kuva-arhiivašta

Muamoni paistama leipä,

Muamoni kutoma šukka,

Muamoni pešömä paita,

Muamoni hoitama kukka,

Muamoni laulama laulu,

Muamoni lettimä tukka,

Muamoni kertoma taru,

Muamoni kantama tuakka.

Muamoni johtama tie...

Elämän totuuteh vie.

Mitä oliski ilman

Šilma: tyhjyš, autiuš, toivottomuš.

 

Tämän kaunehen runon kirjutti karjalaini kirjailija ta runoilija Meeri Tuisku (Meeri Gundireva).

Meeri Pavlovna kirjutti runoja ta kertomukšie karjalan, šuomen ta venäjän kielellä. Hänen runoja alettih painua Neuvosto Karjala-, Punalippu-, Kalevalan Kommunisti- ta toisien lehtien šivuloilla 1970 luvulta alkuan.

Meeri šynty 29. šyyškuuta 1935 vuotena Vuokkiniemeššä. Tytön tuattoh Puavila Mäkelä oli kotosin Vuokkiniemen Kaskol’ašta, muamoh Ida Kallio Pirttilahešta.

Meerin ämmö Našto Kallio oli hyvä starinankertoja. Monta pitkyä iltua punukka oli viettän kuunnellešša ämmön kertomie starinoja Pirttilahen Taipalešša.

Vuotena 1953 Meeri Pavlovna valmistu Uhtuon keškikoulušta ta piäsi opaštumah Karjalan pedagogiseh instituuttih, kumpasen piätti vuotena 1959. Meeri Gundireva monta vuotta eli Jyškyjärveššä ta ruato kyläkoulušša šuomen ta venäjän kielen šekä istorijan opaštajana.

Loppuvuuvvet Meeri Pavlovna eli Koštamukšešša ta kešät vietti omašša Pirttilahen kyläššä. Vuuvven 2000 šyyškuun 25. päivänä Meeri Gundireva šiirty tuonilmasih. Naini on hauvattu Jyškyjärveššä.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat