Vienan Karjala

Kirjutukset vienankarjalakse

“Tarina” viey Vuokkiniemeh

Vuokkiniemen eri ošissa on ašetettu 16 nimikylttie. Kuvašša Il’l’a Vatanen Pajaniemi-kyltin luona. // Kuva: vk.com/domderevnivoknavolok

“Tarina” on interaktiivini oppimatka vanhah runonlaulajien Vuokkiniemen kyläh. Aštumalla kylyä myöten matkalaiset tuttavuššutah Vuokkiniemeh. Erikoisuona on še, jotta taulutietokonehen avulla šuau kuunnella, esimerkiksi, kantelehen šoittuo, kačella vanhoja valokuvie.

Vuokkiniemen kyläššä, kumpani tänä vuotena täyttäy 400 vuotta, on mitä kaččuo luonnonkaunehukšista alkuan paikallisih eläjih – tovellisih karjalaisih šuaten. Ennein karjalaisie näillä mailla elettih saamelaiset. Šen tovissukšena ollah saamelaisperäset kylän ošien, lampien, šelkien, alankojen, šoijen paikannimet, mit ollah kylän lähellä.

Nyt Vuokkiniemen eri ošissa on ašetettu 16 nimikylttie šekä kartta, kumpani autau kylän vierahie šuunnistautuo Vuokkiniemeššä.

Šuunnitelman mukah, omua matkua turistit aletah Kylätalolta. Kylätalolta turistija kaimatah kylän Pappila-ošah, missä on kirikkö. Matalla vierahilla kerrotah poštista, koulušta, vanhojentalošta, kyläneuvoštošta. Šiitä kävelymatka jatkuu, Pappilašta turistit lähetäh kylän keškukšeh – Ryhjäh.

Vuokkiniemen keškukšešša on kauppa, mi šeisou tienristevykšessä. Kaupan vierellä on kylän keškikatu – Arhippa Perttusen katu. 

Šen jälkeh matkalaiset jatetah tuttavuštumista kyläh Pajaniemellä. Ennein šiinä kylänošašša oli paja, missä joka päivä ruato Vuokkiniemen viimeni šeppä Ilmari Lipkin. Pajaniemeltä oppimatka viey Ončintermällä. Täššä kylänošašša 1800-luvun lopušša Ončči-kauppieš piti majataluo. Nyt termällä šijouvutah Ončin talo, vanhat aitat ta hevoistalli. 

Vielä matkalaisilla on kekšitty äijän mitä mukavua. Hyö tuttavuššutah moneh paikalliseh karjalaiseh, maissellah perintehellisie karjalaisie šyömisie, opaššutah tervuamah venehtä, valmistamah perintehellistä marjamuššie.

Tarina-etnomatan šuuri testauš pietäh kyläššä oraškuušša.

 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat